Журналістцы з Мінска запенілі дзверы ў кватэры. Яна там не жыве ўжо 4 гады
Невядомыя залілі дзверы мантажнай пенай у мінскай кватэры журналісткі Таццяны Ашуркевіч. Дзяўчына расказала «Нашай Ніве», з чым звязвае гэта здарэнне.
Зламыснікі не толькі залілі дзверы пенай — на іх яшчэ і пакінулі надпіс фарбай «Вярні доўг». Таццяна напісала ў фэйсбуку, што ў той кватэры яна была прапісаная адна, прытым не жыве там ужо 4 гады.
Некалькі месяцаў таму ў буйным еўрапейскім выданні Politico выйшаў артыкул пад аўтарствам Таццяны Ашуркевіч, прысвечаны міграцыйнаму крызісу ў Беларусі. Пасля гэтага дзяўчыне пачалі пісаць з фэйкавых акаўнтаў і «віншаваць» з заведзенымі на яе крыміналкамі. А той самай раніцай, калі Таццяне запенілі дзверы, па яе прыйшлі з міліцыі.
Журналістка адзначае падабенства гэтага здарэння з іншымі злачынствамі:
«Калі згадаць таксама ананімныя графіці «Вільня наша» ў Вільні, то след мне падаецца відавочным. Маім калегам, расійскім журналістам у той жа Рызе, часта пакідаюць нейкія надпісы на дзвярах.
Калі я даведалася, што здарылася, мяне гэта трохі шакавала, бо гэта зусім дзіўныя метады, на ўзроўні дваровых разборак, і вельмі дзіўная фраза «вярні доўг». Сутнасць была ў тым, каб прынізіць мяне перад суседзямі.
Публічна на мяне не заведзеныя крымінальныя справы — я так разумею, яны не жадаюць прыцягваць увагу да таго тэксту».
На думку Таццяны, той тэкст у Politico і з'яўляецца адзінай нагодай, чаму адбыўся гэты інцыдэнт. Праўда, дакладных доказаў таго, што з гэтым звязаныя сілавікі, яна не мае.
Учынак зламыснікаў яна называе «дзіцячым рашэннем, каб паказаць сваю ўладу»:
«Калі вы разбіраецеся з чалавекам такім чынам, гэта гаворыць пра ваш узровень вядзення спраў. Хочаце зрабіць мне непрыемна? Але я там не жыву ўжо 4 гады.
Напішыце мне проста, вы ведаеце ўсе мае акаўнты, або скажыце пра крымінальныя справы. Аднак псаваць дзверы ў кватэры, дзе я даўно не жыву — гэта проста не мае сэнсу. Мне незразумела, якога эфекту яны хацелі дамагчыся».
«Наша Нiва» — бастыён беларушчыны
ПАДТРЫМАЦЬЦяпер чытаюць
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка4
Каментары