Прэзентавана кніга Уладзіміра Содаля пра памятныя мясціны Багушэвіча ў Кушлянах
Вечарам 16 сакавіка ў мінскай сядзібе «Таварыства беларускай мовы імя Францішка Скарыны» адбылася прэзентацыя кнігі літаратуразнаўцы Уладзіміра Содаля «Блаславёныя Кушляны».
Ілюстраванае літаратурна‑краязнаўчае выданне на 144 старонках выйшла ў сталічным выдавецтве «Кнігазбор» і прысвечана 170‑годдзю з дня нараджэння беларускага паэта, празаіка, публіцыста і перакладчыка Францішка Багушэвіча,
якое будзе адзначацца 21 сакавіка.
Содаль апісвае славутасці колішняга фальварка Кушляны Смаргонскага раёна Гродзенскай вобласці і адрасуе кнігу тым прыхільнікам беларушчыны, якія збіраюцца наведаць Кушляны.
Уладзімір Содаль лічыць Багушэвіча літаратарам сусветнага маштабу — як Тарас Шаўчэнка для Украіны. «Іншая рэч, што Беларусь не адно стагоддзе жыла ў паняверцы, прыгнечаная і непрызнаная. Адсюль і такі слабы водгалас у свеце пра яе лепшых сыноў», — адзначыў ён.
Паводле слоў літаратуразнаўцы, Багушэвіч з павагаў ставіўся да вялікіх асветнікаў чэхаў, балгараў і сербаў, скіроўваў свой позірк да ўсходняй мудрасці, аб чым сведчыць яго пераклад кітайскай байкі «Свінні і вараны», яму належаць шматлікія філасофскія крылатыя выслоўі, кшталту «каб уся зямелька адну праўду мела», «а без таго слова я нямы‑калека, хоць бы занямець мне і да канца века».
«Прываблівала Багушэвіча і постаць сугучнага яму французскага паэта П’ера Беранжэ», — сказаў Содаль.
На яго думку, творчасць Багушэвіча не страціла сваёй надзённасці і сёння,
аб чым сведчыць змест яго многіх вершаў, у тым ліку «Праўда» і «Як праўды шукаюць». Зараз Содаль працуе над чарговай кнігай «Даследніцкія дэтэктывы», у якой шмат месца прысвячаецца жыццю і дзейнасці Багушэвіча.
Разам са сваёй сям’ёй Багушэвіч удзельнічаў у нацыянальна‑вызваленчым паўстанні 1863—64 гадоў і быў паранены ў баях у Аўгустоўскіх лясах. Як адзначыў даследчык, Багушэвіч — рэвалюцыйны дэмакрат, адзін з пачынальнікаў крытычнага рэалізму ў беларускай літаратуры, будзіцель гістарычнай і нацыянальнай свядомасці беларусаў.
Зараз імя Багушэвіча носіць плошча ў Мінску і Ашмянскі краязнаўчы музей. Створаны Літаратурна‑мемарыяльны музей‑сядзіба Францішка Багушэвіча ў Кушлянах. Помнікі паэту ўсталяваныя ў Смаргоні, Жупранах (Ашмянскі раён Гродзенскай вобласці) і на яго магіле ў гэтым мястэчку.
Амаль усе чаты і суполкі калоній і СІЗА Беларусі прызналі экстрэмісцкімі фармаваннямі. Пад пагрозай тысячы чалавек5
Каментары