На працэсе над Мікалаем Аўтуховічам, Уладзімерам Асіпенкам, Міхаілам Казловым і Аляксандрам Ларыным дапыталі чалавека, які падпальваў дом міліцыянта Кацубы і сьведку, які знайшоў гранатамёт. Юрый Арцюкевіч прызнаны судом вінаватым у падпале дому былога начальніка ваўкавыскай міліцыі Кацубы і падпальваньні гаражу і аўтамабіля супрацоўніка падатковай інспэкцыі Мандзіка.
Юрый Арцюкевіч адбывае пакараньне ў калёніі. На працэс ў Вярхоўны суд сьведку прывезьлі ў кайданках, як і Аляксандра Козела, якога дапытвалі ўчора, 25 сакавіка. Сёньня Юры Арцюкевіч паўтарыў тое ж, што казаў на сваім судзе: што ён разам з Козелам падпаліў дом міліцыянта Кацубы, ні ад каго замовы на гэтае злачынства ён не атрымліваў, грошай яму не давалі.
Паводле Арцюкевіча, гэтак ён помсьціў начальніку міліцыі за свае асабістыя праблемы: міліцыянты да яго незаслужана чапляліся, не давалі пачаць нармальнае жыцьцё пасьля першай судзімасьці, схілялі да супрацоўніцтва. Што да падпалу гаражу і аўтамабіля Мандзіка, паводле Арцюкевіча, гэта адбылося незнарок: ён залез у гараж, каб скрасьці калёсы, але праліў паліва і выпадкова ўзьнік пажар.
«Падчас сьледзтва на мяне аказвалі псыхалягічны ціск, каб сказаў, што гэта Аўтуховіч замовіў падпалы, але ён тут не пры чым.
Мяне і потым, ужо падчас адбыцьця пакараньня дапытвалі па гэтай справе і зноў схілялі агаварыць Аўтуховіча. Абяцалі «залатыя горы»: перавод ў любую калёнію, нават датэрміновае вызваленьне», — паведаміў суду Юрый Арцюкевіч.
Раней на працэсе гучала, што Аўтуховіч даваў Арцюкевічу відэакамэру, каб той здымаў дом міліцыянта Кацубы. Гэтыя зьвесткі сьведка пацьвердзіў. «Гэта было патрэбна, каб зьняць на відэа арыштантаў, якіх прывозілі працаваць на доме начальніка міліцыі», — патлумачыў сьведка Юрый Арцюкевіч.
Пра знаёмства з Мікалаем Аўтуховічам сьведка распавёў, што пазнаёміўся зь ім праз сваякоў. Аўтуховіч нібыта добра да яго ставіўся, дапамагаў яму як маладому чалавеку, які рана застаўся без маці і апынуўся ў складанай сытуацыі пасьля першай судзімасьці.
На працэсе таксама даў паказаньні настаўнік біялёгіі гарадзенскага ліцэю №1 спадар Піхо, які 28 кастрычніка 2005 года знайшоў на тэрыторыі ліцэя гранатамёт.
Сьведка паказаў, што працаваў на клюмбах каля плоту, калі знайшоў гранатамёт. Зброя ляжала пад самаробнай маскіровачнай сеткай. У гэтым месцы расьлі кусты, якія сьведка зьбіраўся падрэзаць.
«У гэтай частцы паказаньні сьведкі супадаюць з тым, што казаў Аляксандр Ларын. Што быццам вакол было больш кустоў, чым на фотаздымку пры аглядзе месца, які зрабілі праз некалькі дзён. Маўляў, іх потым падрэзалі. І вось сьведка кажа, што сапраўды працаваў на клюмбе. Але мне падаецца, што Ларын проста аднекуль ведаў, што будзе казаць сьведка. Вельмі настойліва ён падкрэсьліваў гэтую дэталь пра кусты», — мяркуе праваабаронца Алег Воўчак, які трывала сочыць за працэсам.
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»37
Каментары