Выдавецтва «Скарына» прэзентавала «Віленскую серыю».
Выдавецтва «Скарына» запачаткавала «Віленскую серыю», у якой плануецца выдаваць творы віленскіх беларускіх аўтараў як мінулага, так і сучаснасці, піша «Новы час».
Першая кніга новай серыі — «Там, дзе мяне няма» — успаміны Галіны Войцік (1927—2007), вядомай віленчанкі, германісткі, перакладчыцы і грамадскай дзяячкі.
Усё жыццё гэтая працавітая даследчыца рыхтавала кнігі і праграмы пра іншых беларусаў Вільні і не мела часу напісаць сваю ўласную кнігу. Але яна пакінула ўспаміны, якія друкаваліся ў газетах «Рунь» і «Наша Ніва».
Аўтарка жадала пабачыць свае ўспаміны пад адной вокладкай. Яе мара здзейснілася толькі цяпер.
Заслуга ў гэтым пісьменніка Алега Мінкіна, які падрыхтаваў рукапіс. У выдавецтве «Скарына» рукапіс быў дапрацаваны і дапоўнены фрагментамі з успамінаў Галіны Войцік, запісаных на радыё Сяргеем Дубаўцом. Таксама да тэксту далучыўся сын Галіны Войцік Яраслаў. Ён дапамог і са здымкамі пісьменніцы. Акрамя гэтага ў кнігу ўвайшлі публікацыі Г. Войцік з розных зборнікаў, прысвечаных Вільні. Уступнае слова напісалі Алег Мінкін і Людвіка Кардзіс.
Такім чынам, «Віленская серыя» стартуе з кнігай, якая ахіне сучасных беларусак і беларусаў Вільні гаючымі ўспамінамі, горкімі і смешнымі гісторыямі мінулага, пра якое многія забыліся ці проста не ведалі. Як і «Вандроўкі па Вільні» Лявона Луцкевіча, мужа Г. Войцік, новая кніга запрашае да вандровак па беларускіх мясцінах Вільні, з любоўю апісаных пісьменніцай.
Друкаваная кніга з’явіцца ў продажы напрыканцы месяца, а электронную можна чытаць ужо цяпер. Прэзентацыі плануюцца ў Вільні і ў іншых месцах рэгіёна ўлетку.
Таксама ў «Віленскай серыі» рыхтуюцца творы Францішка Умястоўскага, Краўцова Макара, Уладзіслава Паўлюкоўскага, Янкі Багдановіча, Алены Цэпрынскай ды іншых аўтараў, чый лёс звязаны з Вільняй.
Цяпер чытаюць
Малодшы сын Сахашчыка абвешчаны зніклым без вестак. Выглядае, ён ваяваў за Расію84
Каментары