«Дзявятка» на беларускіх аўтамабільных нумарах: тыкток гадае, што гэта значыць
Упершыню з'явілася сведчанне, што ў Беларусі ўжо даюць нумары з новым рэгіёнам.
У тыктоку з'явілася відэа, знятае ў Маскве, заўважыў NewGrodno. На ім — аўтамабіль з беларускімі нумарамі. Аўтар роліка звярнуў увагу на незвычайную дэталь — лічбу 9 напрыканцы дзяржнумара, якая абазначае рэгіён рэгістрацыі.
Блогер успрыняў дзявяты рэгіён як элемент «прасунутага цюнінгу». Нумары ён назваў «містычнымі», а некаторыя каментатары нават засумняваліся ў іх легальнасці.
«Дзявятага рэгіёна ў Беларусі няма», — катэгарычна заявіў адзін з каментатараў. Некаторыя і ўвогуле абвінавацілі аўтамабіліста ў падробцы нумароў, заявіўшы, што нумары на машыне «левыя».
Але знайшліся і тыя, хто абараняў аўтамабіліста.
«Нумары скончыліся на 7/8, вось і выдаюць на 9 — гэта Мінск», — высунуў сваю тэорыю адзін з каментатараў.
«Нармальны беларускі нумар. Е — электрычка. У электрычных тры лічбы пасля Е, а не чатыры. А 9 — новая лічба мінскага рэгіёна», — — патлумачыў больш дасведчаны карыстальнік.
Пра хуткае з'яўленне машын на нумарах з кодам рэгіёна 9 у беларускай Дзяржаўтаінспекцыі казалі яшчэ на пачатку вясны.
Дзявяты нумар планавалі аддаць не Мінску, як выказаў здагадку адзін з каментатараў, а Мінскай вобласці. Гэтай вясной сталіца першай з рэгіёнаў Беларусі выбрала свае нумары з сёмым індэксам, і ёй аддалі наступную лічбу — васьмёрку. Машыны з такім індэксам ужо масава з'явіліся на вуліцах Мінска.
Анансуючы з'яўленне нумароў з дзявяткамі на дарогах краіны, начальнік галоўнага ўпраўлення ДАІ Віктар Ротчанкоў таксама заявіў, што ў будучыні плануецца ўвогуле адысці ад аўтамабільных нумароў з прывязкай да рэгіёнаў і выкарыстоўваць іншыя.
«Яны будуць утрымліваць тры лічбы і чатыры літары. Можа, казаць пра гэта яшчэ заўчасна, але тэхнічна мы ўжо гатовыя да вырабу такіх нумарных знакаў», — тлумачыў гэтай вясной Ротчанкоў.
Гэта машына на відэа з дзявяткай на нумарах стала першым публічным сведчаннем, што такія нумары ўжо робяць.
Цяпер чытаюць
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім16
«Вельмі добра разумею беларускую мову. Нават не думаў». З'явілася ВІДЭА размовы беларускіх палітвязняў з Зяленскім
Бабарыка і Калеснікава пагаварылі з Інгай Ругінене і заклікалі Літву «далучыцца да дыпламатычных намаганняў ЗША» і «не прапусціць акно магчымасцей»3434
Каментары