Расійскай спявачцы Наока далі штраф за песню Манетачкі. Яна выконвае на вуліцы песні забароненых музыкантаў
Перад гэтым 18‑гадовая дзяўчына адсядзела 13 сутак.
Ленінскі раённы суд Пецярбурга сёння разгледзеў адміністрацыйны пратакол аб дыскрэдытацыі расійскай арміі ў дачыненні да 18‑гадовай вулічнай спявачкі Дзіяны Логінавай, вядомай як Наока, піша «Медыязона».
Дзяўчына ўжо правяла 13 сутак у спецпрыёмніку — яе прызналі вінаватай у арганізацыі масавага мерапрыемства (частка 1 артыкула 20.2.2 КаАП). Сёння адразу пасля вызвалення яе павезлі ў суд для разгляду наступнага адміністрацыйнага пратакола.
У выніку суддзя Алена Самсонава аштрафавала Наоку на 30 тысяч расійскіх рублёў (380 даляраў) па пратаколе аб «дыскрэдытацыі» арміі з-за выканання песні Манетачкі «Ты салдат».
Аднак дзяўчыну не адпусцілі з залы суда пасля вынясення штрафу, яе з канвоем вывелі з суда. Адзін з сілавікоў, якія яе суправаджалі, сказаў, што Дыяна Логінава «працэсуальна затрыманая»: яе павязуць назад у 76‑ы аддзел міліцыі для складання чарговага пратаколу. Што гэта за пратакол — невядома.
18‑гадовая Наока (Дзіяна Логінава) вядомая як вакалістка вулічнага гурта Stoptime, свае выступы музыкі анансавалі ў тэлеграм-канале. У інтэрнэце сталі віруснымі відэа яе выступленняў з выкананнем песень «Порнафільмаў», Манетачкі, Noize MC і іншых музыкаў, прызнаных у Расіі «замежнымі агентамі».
На адным з апублікаваных відэа музыкі выконваюць песню «Кааператыў «Лебядзінае возера»» рэпера Noize MC, якую ў маі расійскі суд забараніў, указаўшы, што ў ёй «выкарыстоўваюцца прыніжальныя і абразлівыя характарыстыкі, якія могуць быць атаясамлены з фігурай, што сімвалізуе народ РФ».
У жніўні музыкаў затрымлівалі пасля аналагічнага выступлення, і тады яны паабяцалі, што не стануць змяняць рэпертуар. У той раз прычынай для затрымання стала парушэнне рэжыму цішыні — музыкаў адпусцілі пасля афармлення штрафаў.
«Вядома, мы працягнем стрытаваць, бо мы не напужаныя і не зламаныя», — падкрэслівала Наока.
Наоку затрымалі 15 кастрычніка ў Пецярбургу. Яна ноч правяла ў пастарунку міліцыі Пецярбурга. Ноч у аддзеле правялі таксама Аляксандр Арлоў і Уладзіслаў Лявонцьеў, удзельнікі Stoptime. Ёй далі 13 сутак (Яе прызналі вінаватай у арганізацыі масавага мерапрыемства). Яе калегаў асудзілі на такія ж тэрміны.
Сёння Наоку пасля вызвалення зноў прывезлі ў суд. Адказваючы на пытанні суддзі, дзяўчына кажа, што проста выконвала песні, якія ёй падабаюцца, у тым ліку песні Віктара Цоя і «Грамадзянскай абароны».
Іна Кулей: Мілінкевіч перамог смерць, але шлях да поўнага адужання няблізкі4
Каментары