Памятаеце чыноўніка, якога крэатыўна адмазалі ад забойства чалавека на паляванні? Ён адмазаўся зноў
Колішні мэр Докшыц Алег Пінчук у пачатку 2020‑га выпадкова застрэліў на паляванні свайго даўняга таварыша, бізнэсмена Валерыя Янчака. У лесе яны былі ўдвух, сведкаў не было. СК завёў справу за забойства па неасцярожнасці, а потым увогуле крэатыўна вызваліў Пінчука ад адказнасці, бо той жыў на забруджанай Чарнобылем тэрыторыі. Дык вось, нядаўна ў Пінчука здарылася новая гісторыя, звязаная з паляваннем.
Як стала вядома «Нашай Ніве», Алег Пінчук, які ў гэты момант узначальвае «Глыбокаегаз», зноў быў затрыманы супрацоўнікамі Дзяржаўнай інспекцыі па ахове жывёльнага і расліннага свету па падазрэнні ў браканьерстве.
Гэта адбылося ў сярэдзіне кастрычніка. У лесе знайшлі сляды забойства жывёлы. Неяк выйшлі менавіта на Пінчука.
У чыноўніка правялі вобшук, знайшлі незарэгістраваныя элементы зброі для непрыкметнага палявання (глушыльнік-полымягасіцель) і дапыталі.
Але надоўга затрыманы Пінчук не быў, ужо 21 кастрычніка ён быў на працоўным месцы і ў размове з журналістам незадаволеным голасам адмаўляў якія б там ні было праблемы з законам.
Як цяпер нам стала вядома, ніякіх праблем з законам у Пінчука насамрэч няма.
Загадкавым чынам следчым не ўдалося даказаць, што знойдзеныя дома ў Пінчука глушыльнікі належаць менавіта яму. Ён патлумачыў, што гэта маёмасць нейкай іншай асобы, якая жыве за мяжой.
Нагадаем, у 2020 годзе Пінчук пазбегнуў адказнасці за ненаўмыснае забойства, бо трапіў пад амністыю. На яго карысць згуляла тое, што ён калісьці жыў у забруджанай зоне і меў адпаведны статус. Таму тую справу закрылі.
Каментары