Ва Украіне расследуюць справу былога дэпутата, які перад самай вайной збег у Беларусь
Ва Украіне распачалі завочнае дасудовае расследаванне ў дачыненні да былога дэпутата Вярхоўнай Рады Алега Валошына. Адпаведны дазвол выдаў суд. Валошын пакінуў Украіну за тыдзень да пачатку расійскага ўварвання ў 2022 годзе і выехаў у Беларусь, піша «Радыё Свабода».
Як вынікае з матэрыялаў, якімі валодае «Радыё Свабода», крымінальную справу супраць Валошына завялі яшчэ напрыканцы студзеня 2022 года. Спачатку экс-дэпутату інкрымінавалі дзяржаўную здраду, за што прадугледжана пакаранне ў выглядзе працяглага пазбаўлення волі з магчымай канфіскацыяй маёмасці.
У снежні 2025 года да абвінавачання дадалі яшчэ адзін артыкул — непадачу дэкларацыі асобай, якая выконвае дзяржаўныя функцыі. Гэтае парушэнне можа карацца буйным штрафам, абмежаваннем волі або кароткатэрміновым зняволеннем з забаронай займаць пасады.
Сярод доказаў у справе — відэаматэрыялы з прапагандысцкай праграмы «САСС уполномочен заявить», якая выходзіла на беларускім дзяржаўным тэлеканале СТВ да чэрвеня 2025 года. Праграму вяла жонка Валошына — Надзея Сас. Следства аналізавала выпускі за перыяд з снежня 2022‑га да лютага 2023 года.
Паводле высноў экспертызы, у выказваннях Алега Валошына змяшчаліся элементы прапаганды, якія сведчаць пра падтрымку дзеянняў вайскова-палітычнага кіраўніцтва Расіі падчас агрэсіі супраць Украіны. Такія заявы, на думку спецыялістаў, маглі фарміраваць антыўладныя настроі ва ўкраінскім грамадстве і наносіць шкоду суверэнітэту, тэрытарыяльнай цэласнасці і інфармацыйнай бяспецы краіны.
Следства таксама сцвярджае, што 13 лютага 2022 года Валошын выехаў у Беларусь, а ў дні, калі ў Расіі прымалася рашэнне аб уварванні ва Украіну, знаходзіўся на тэрыторыі РФ.
Раней Алег Валошын працаваў прэс-сакратаром Міністэрства замежных спраў Украіны ў часы прэзідэнцтва Віктара Януковіча, а пасля змены ўлады ўзначальваў міжнародны аддзел тэлеканала «112-Украіна». Яго жонка таксама працавала на медыярэсурсах, якія звязвалі з Віктарам Медзведчуком — кумам Уладзіміра Пуціна.
Цяпер чытаюць
У Шэймана знайшлі яшчэ адну магчымую каханку і сына. Сакратарка без вышэйшай адукацыі за лічаныя гады стала ўласніцай раскошных дамоў і гандлёвага цэнтра4
У Шэймана знайшлі яшчэ адну магчымую каханку і сына. Сакратарка без вышэйшай адукацыі за лічаныя гады стала ўласніцай раскошных дамоў і гандлёвага цэнтра
«Што, грохнуць дзяцей Ціханоўскай, каб звярнулі ўвагу на маю праблему?» Як тупы каментар актывіста Дзяніса Дашкевіча стварыў яму праблемы ў Польшчы2929
Каментары
[Зрэдагавана]