Аляксандр Лукашэнка даручыў старанна прапрацаваць перспектывы рэалізацыі беларускага цукру на знешніх рынках, а таксама вывучыць мэтазгоднасць будаўніцтва новага цукровага завода. Адпаведнае даручэнне кіраўнік дзяржавы даў 23 верасня падчас рабочай паездкі ў Мінскую вобласць, паведамляепрэс-служба кіраўніка дзяржавы.
«Пытанне ў тым, ці трэба нам павялічваць аб’ём вытворчасці цукру. Трэба ісці не ад таго, колькі мы можам апрацоўваць цукровых буракоў, а ісці ад рынку», — адзначыў прэзідэнт.
Закрануўшы пытанне будаўніцтва ў Беларусі новага цукровага завода, Лукашэнка падкрэсліў неабходнасць «вывесці існыя заводы на правільную дарогу, калі ёсць магчымасць — нарошчваць іх магутнасці, вызначыць рынкі збыту і ў канцы гэтага ланцужка вырашыць, ці трэба будаваць новы завод».
Прэзідэнт быў праінфармаваны, што ў рэспубліцы ёсць значны патэнцыял для павелічэння аб’ёмаў вытворчасці цукру і без будаўніцтва новага, даволі дарагога прадпрыемства, за кошт павышэння ўраджайнасці і цукрыстасці буракоў.
Так, да 2015 года плануецца павялічыць сярэднюю ўраджайнасць цукровых буракоў у гаспадарках Беларусі з цяперашніх 460 ц/га да 520 ц/га. За кошт выкарыстання інтэнсіўных тэхналогій у сельскай гаспадарцы таксама павінна ўзрасці сярэдняя цукрыстасць з 16% да 18%.
Разам з тым кіраўнік дзяржавы звярнуў увагу, што ў выпадку прыняцця рашэння аб будаўніцтве новага цукровага завода гэта трэба зрабіць у найбольш кароткія тэрміны, на працягу двух з паловай гадоў. Пры гэтым неабходна паралельна весці прапрацоўку рынкаў збыту і стварэнне сыравіннай зоны.
Паводле меркавання кіраўніка дзяржавы, для забеспячэння гарантаваных паставак беларускага цукру на экспарт можна падумаць аб прыцягненні ў цукровую галіну замежных інвестараў. Аднак гэта павінна адбывацца выключна на ўзаемавыгаднай конкурснай аснове, падкрэсліў Лукашэнка.
Цяпер у краіне функцыянуюць чатыры цукровыя заводы. У суткі перапрацоўваецца 26,8 тысяч тон буракоў. Пачынаючы з 2004 года, Беларусь выйшла на забеспячэнне насельніцтва цукрам за кошт уласных сыравінных рэсурсаў.
Сярод краін СНД яна займае па вытворчасці цукру з цукровых буракоў трэцяе месца пасля Расіі і Украіны. Значна пашыраны асартымент цукровай прадукцыі. У 2009 годзе экспарт склаў амаль 440 тысяч тон цукру.
У 2010 годзе перад буракаводамі краіны стаіць задача вырасціць 4 млн. тон цукровых буракоў.
Цяпер чытаюць
Сына экс-кіраўніка Брэсцкай вобласці асудзілі за ўдзел у пратэстах2
Каментары