Дзякуючы сланцаваму газу, тысяча кубоў газу ў ЗША цяпер каштуе ўсяго 140 даляраў.
Дзякуючы выкарыстанню сланцавага газу ЗША займелі такі лішак таннай сыравіны, што рыхтуюцца да экспартнай экспансіі ў свеце.
Кіраўнік амерыканскага газапорта Freeport LNG разам з аўстралійскім фондам Macquarie мае намер да 2015 года выдаткаваць $2 млрд на экспарт газу з Freeport’а, у першую чаргу ў Азію. Тэрмінал Freeport LNG быў пабудаваны некалькі гадоў таму, калі амерыканскія эканамісты прадказвалі, што ўласныя запасы газу будуць вычарпаныя, і Злучаным Штатам давядзецца імпартаваць яго ўсё больш.
Гэтыя прадказанні былі абвергнутыя каля чатырох гадоў таму, калі былі распрацаваныя наватарскія метады здабывання газу са сланцавых скалаў.
Дзякуючы гэтаму вытворчасць газу ў ЗША хутка расце, і ўжо ў мінулым годзе ЗША ўпершыню за апошнія дзесяць гадоў забралі ў расійцаў званне найбуйнейшага вытворцы газу ў свеце.
— У нас ёсць уласныя рэсурсы газу, дастатковыя для задавальнення патрэбаў ЗША на наступныя сто гадоў, — падкрэсліў кіраўнік Freeport LNG Майкл Сміт, якога цытуе Reuters. У Злучаных Штатах вырабляецца ўсё больш і больш сланцавага газу, і кошты на сыравіну ў гэтым годзе ў ЗША ўпалі ўжо на чвэрць.
За 1 тыс. кубічных метраў газу ў ЗША цяпер плацяць каля 140 даляраў — амаль у тры разы менш, чым Польшча плаціць «Газпраму».І ў той жа час усё больш і больш кампаній хочуць выкарыстаць сланцавы бум.
Экспарт — найлепшы спосаб рэгуляваць лішкі таннага газу са сланцаў і выкарыстоўваць амерыканскія газапорты, якія прастойваюць за непатрэбнасцю — з гэтым пагаджаецца ўсё больш экспертаў па той бок Атлантыкі. У ЗША, прынамсі ў сярэднетэрміновай перспектыве, будзе лішак газу, які можа быць экспартаваны, — паведаміў Робін Бэйкер, кіраўнік энергетычнага аддзела французскага банка Société Générale.
Вялізныя запасы сланцавага газу адкрытыя таксама ў Нямеччыне, Польшчы, Украіне. Калі радовішчы ўдасца распрацаваць, Еўропа зможа радыкальна збіць цэны на расійскі газ.
Геолагі мяркуюць, што гарызонты, багатыя на сланцавы газ, могуць цягнуцца і ў Беларусь.
Цяпер чытаюць
Рэдактара незалежнай баранавіцкай газеты «Інтэкс-Прэс» Янукевіча прысудзілі да 14 гадоў калоніі, яго намесніка Пакаленку — да 12 гадоў6
Каментары