Банк Snoras, нацыяналізаваны ўрадам Літвы ў лістападзе, будзе выплачваць застрахаваныя ўклады насельніцтву і арганізацыям 5 гадоў. Аб гэтым заявіла міністр фінансаў краіны Інгрыд Шыманіце.
Паводле яе словаў, Фонд страхавання ўкладаў для выплаты кампенсацый атрымае ўрадавы крэдыт на 3,3 млрд літаў. Гэта істотна больш, чым планавалася раней.
Агульны аб’ём кампенсацый павінен скласці каля 4,1 млрд літаў. 1,7 млрд мае сам фонд. Урад разлічваў пазычыць арганізацыі 2,4 млрд, аднак перагледзела гэтую суму ў бок павелічэння: кіраўніцтва краіны не хоча спяшацца з продажам папер, якія знаходзяцца на балансе фонду, каб пазбегнуць страт.
Канкрэтная ўапатрабаванасць сродкаў будзе залежаць ад таго, наколькі хутка людзі будуць вяртаць укладзеныя ў банк сродкі. Каб пазбегнуць ажыятажу, тэрмін выдачы кампенсацый зрабілі максімальна доўгім.
Snoras быў нацыяналізаваны 16 лістапада. Улады западозрылі акцыянераў — расійскага прадпрымальніка Уладзіміра Антонава і літоўца Раймондаса Баранаўскаса — у незаконным вывадзе сродкаў. Уласнікі на той момант знаходзіліся за мяжой. Пазней стала вядома, што Антонаў і Баранаўскас здалі пашпарты уладам Лондана і не збіраюцца з’язджаць з Англіі. Банкіраў затрымалі 25 лістапада, але затым выпусцілі пад заклад.
Цяпер чытаюць
Бліжэйшым часам будуць вызвалены больш за 150 палітзняволеных24
Каментары