Халезін ставіць у Польскім тэатры спектакль пра сваю жонку

Героямі спектакля сталі жонка кандыдата ў прэзідэнты Беларусі, журналістка «Новай газеты» Ірына Халіп, рэдактар charter97.org Наталля Радзіна, сястра Андрэя Саннікава Ірына Багданава, удава выкрадзенага ў Беларусі бізнэсмэна Ірына Красоўская, дачка палітвязня Змітра Бандарэнкі Юлія, дырэктар Свабоднага тэатра Наталля Каляда.

У сваім блогу кіраўнік Беларускага Свабоднага тэатра прыпадняў заслону сакрэтнасці і расказаў пра спектаклі, які цяпер ставіць у Польскім тэатры ў Варшаве:

«Ідэя спектакля нарадзілася пасля таго, як на сустрэчу з намі ў Ліён, дзе мы тады выкладалі, прыехаў з Парыжа Анджэй Северын. Яго імклівае з’яўленне — усяго на некалькі гадзін для перамоваў — выглядала крыху дзіўным. На той момант, у лютым 2010 года, Северын служыў у тэатры „Камедзі Франсэз“, і было відавочна, што размаўляць ён збіраўся не пра пастаноўку Мальера на гранд-сцэне гэтага тэатра-музея. Да таго ж, яго „рэгаліі“ стваралі пэўную дыстанцыю — кавалер Ордэна Ганаровага Легіёна; любімы актор Анджэя Вайды; „святыня“ „Камедзі Франсэз“…

Але мы ўбачылі вельмі адкрытага, эмацыйнага чалавека, які за тры хвіліны разбіў усе ўмоўныя бар’еры. Ён паведаміў, што з верасня сыходзіць у гадавы адпачынак у тэатры (у штатных актораў „Камедзі Франсэз“ ёсць права раз на дзесяць гадоў браць гадавы адпачынак з захаваннем заробку) і падпісвае кантракт з варшаўскім Teatrom Polskim, што ўжо некалькі дзесяцігоддзяў у вельмі глыбокім крызісе. Анджэй прапанаваў нам паставіць спектакль у гэтым тэатры, з тымі акторамі, якія ўвойдуць у абноўленую трупу. Першапачаткова гаворка ішла пра п’есу „Пакаленне Jeans“, але вельмі хутка мы адкарэктавалі праект, вырашыўшы сумясціць на сцэне 2 тэксты — „Пакаленне Jeans“ і п’есу Наталлі Каляды „Ім сніліся сны“, якая расказвае пра жонак выкрадзеных і забітых беларускіх палітыкаў і грамадскіх дзеячаў. Прычым мы планавалі зрабіць двухактавы спектакль, у якім „Пакаленне“ павінен быў ставіць я, а „Сны“ — Уладзімір Шчэрбань.

Адказаўшы прынцыповай згодай, мы і не меркавалі, што гэты праект адсунецца на два гады, цягам якіх у нашай краіне адбудуцца падзеі, што прымусяць нас асесці ў Англіі. Усе калізіі, узгадненні і два кастынгі засталіся за спінай, і 28 сакавіка я правёў першую рэпетыцыю. Але папярэднічала гэтаму сур’ёзная трансфармацыя праекта. Па-першае, Валодзя не змог удзельнічаць у гэтай працы, бо адначасова рэпетуе два спектаклі ў Англіі — „Караля Ліра“, прэм’ера якога пройдзе ў шэкспіраўскім тэатры „Глобус“ 17 і 18 траўня, і дапрацоўвае „Мінск-2011“, які рыхтуецца да вялікага брытанскага тура і паказу на сцэне тэатра Young Vic.

Давялося перапрацоўваць і п’есы.

Не буду занурацца ў прафесійныя нюансы, а ў канцы раскажу пра размеркаванне роляў. Цяпер пра гэта казаць можна, бо склад зацверджаны, працуе, і, спадзяюся, змяненняў больш не зведае. Верхні радок — імя актора, ніжні — персанаж, ролю якога ён выконвае.

Прэм’ера прызначаная на 9 чэрвеня».

• 0
• 0
• 0
• 0
• 0
• 0
• 0
• 0