Апытанне ў Гродне аб мэтазгоднасці пераходу на расійскі рубель.
Расія намякае, каб Беларусь хутчэй праводзіла прыватызацыю і ўводзіла расійскі рубель. Наш карэспандэнт пацікавіўся, як ставяцца да гэтага прахожыя на вуліцах Гродна. Вось якія былі адказы:
— Я думаю, што ўвесь заходні рэгіён Беларусі супраць, а ўсходні — за. Пераможа, канешне, усходні рэгіён у дадзеным выпадку, таму што ў нашай краіны адпачатку накірунак такі прарасейскі. Прывядзе да страты суверэнітэту, гэта будзе фармальны суверэнітэт, калі застанецца. Але, у прынцыпе, гэта прывядзе да страты незалежнасці
— Міша, як ты думаеш, нам патрэбны расейскі рубель ці не патрэбны? Патрэбны і пабольш! (Смяецца). Прыватызацыя таксама патрэбная, а як жа без прыватызацыі? Ну, што мы, так і будзем пхацца ў хвасце ўсёй Еўропы?
— Яна скарае, каб забраць беларускую маёмасць і — у склад «расійскай імперыі». Каб аднавіць, толькі крыху ў іншым выглядзе, Савецкі Саюз, назва толькі будзе іншай.
— Я лічу, што не трэба гэта нам. Я супраць поўнай інтэграцыі, павінна быць незалежная Беларусь.
— Супраць таксама. Мы — незалежная Беларусь, у нас усё сваё. Чужога нам не трэба.
— Лічу, што не. Я не тое, што супраць, проста лічу, што лепей незалежна ад Расіі быць.
— Навошта? Я — супраць. Толькі хачу, каб усе нармальна жылі, не існавалі. Навошта нам рубель, мы ж суверэнная дзяржава ці якая?
— Расейскі рубель каб увялі? Я думаю, не варта. Для Беларусі лепей, каб незалежная была і каб вяла сваю дзяржаўную палітыку. Прыватызацыя — гэта таксама няправільна, бо выкупяць усе прадпрыемствы, і Беларусь страціць сваю незалежнасць эканамічную.
— Супраць гэтага, таму што калі не будзе сваёй валюты, не будзе незалежнасці. Будуць расійцы, колькасць працоўных месцаў скароціцца, і не ведаю, чым будуць людзі займацца. Але, напэўна, такая сітуацыя эканамічная цяпер, што мы вымушаныя некаторыя патрабаванні выконваць.
— Я — супраць, але такога не будзе. Расія нас не прыме, у нас занадта слабая эканамічная сітуацыя, увогуле эканоміка. Ім нявыгадна нас браць, цягнуць на сабе яшчэ гэты абоз. Можа гэта шантаж, можа, каб людзі не расслабляліся.
Цяпер чытаюць
Памёр паэт Уладзімір Карызна, аўтар слоў да цяперашняга дзяржаўнага гімна Беларусі8
Каментары