Ён змешчаны ў медсанчастку.
У палітвязня Змітра Дашкевіча, які адбывае пакаранне ў Глыбоцкай калоніі, выяўлена запаленне лёгкіх — аднабаковая пнеўманія. Пра гэта ў сваім фэйсбуку паведаміла нявеста Змітра, лідарка «Маладога фронту» Наста Палажанка.
Нагадаем, што Зміцер Дашкевіч больш за 1,5 года знаходзіцца за кратамі.
Зміцер быў затрыманы разам са сваім таварышам па МФ Эдуардам Лобавым 18 снежня 2010 года, напярэдадні выбараў прэзідэнта, па абвінавачанні ў збіванні двух мінчан. І Дашкевіч, і Лобаў катэгарычна адмаўлялі абвінавачанні, але суд прызнаў іх вінаватымі. 24 сакавіка 2011 года Дашкевіч быў прыгавораны да двух гадоў пазбаўлення волі ў калоніі агульнага рэжыму. У месцах пазбаўлення волі Дашкевічу неаднаразова прапаноўвалі напісаць прашэнне аб памілаванні на імя Лукашэнкі, але ён адмаўляўся гэта зрабіць. У апошні час лідар «Маладога фронту» перыядычна памяшчаецца ў штрафны ізалятар калоніі № 13 у Глыбокім (Віцебская вобласць), дзе ён адбывае пакаранне.
Нядаўна ў дачыненні да Дашкевіча распачалі новую справу — па ч. 1 арт. 411 КК (злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі).У выпадку прызнання віны Дашкевічу пагражае пазбаўленне волі тэрмінам да аднаго года (цяпер яму застаецца адбыць пяць месяцаў пакарання).
Усе судовыя працэсы па справах Змітра Дашкевіча былі расцэненыя праваабаронцамі як палітычна матываваныя, а арганізацыя «Міжнародная амністыя» двойчы прызнавала яго вязнем сумлення.
20 ліпеня Змітру Дашкевічу споўніўся 31 год.
Яму можна адправіць ліст або паштоўку. Адрас наступны:
Зміцер Дашкевіч
папраўчая калонія № 13
вул. Савецкая, 205
г. Глыбокае,
Віцебская вобл., 211791.
Таксама можна даць тэлеграму, патэлефанаваўшы са свайго гарадскога тэлефона нумара на нумар 166.
Каментары