У Гродне працягваецца руйнаванне Новага Свету — фота
У знесеным будынку можна было б размясціць музей стваральніка заапарка Яна Каханоўскага.
Стары прыватны дом на вул.17 Верасня, 52, пабудаваны на пачатку 1930-х гадоў, фактычна зруйнаваны, піша «Твой стыль».
Спакваля ўлады ўсё ж такі рэалізуюць свой план «чысткі» легендарнага кварталу ў старой Гародні.
Шэраг прыватных дамоў па вул. 17 Верасня (раней — «Крэсовай»), як мяркуюць гісторыкі, паўстаў на пачатку 1930-х гг. Частка з іх, які і знесены будынак, носяць выразныя рысы канструктывізму.
Высветліць дакладна, хто быў першапачатковым уладальнікам знесенага дома, не атрымалася, аднак дакладна вядома, што праз пару дамоў ад яго, на месцы сучаснай 2-й школы, стаяў падобны асабняк Яна Каханоўскага — закладальніка Гарадзенскага заапарку.
У тыя часы раён знаходзіўся фактычна на ўскрайку гораду, мяжуючы з уладаннямі Друцкіх-Любецкіх ды былой загараднай каралеўскай рэзідэнцыяй — Станіславова.
Тэхніка каля двухпавярховага драўлянага будынку па вул. 17-га Верасня, 52 з'явілася яшчэ на мінулым тыдні, што і вызначыла ягоны лёс.
Шкада аднак, што знайшоўшы грошы на адбудову заапарку, не знайшлося магчымасцяў, напрыклад, на стварэнне дома-музея Яна Каханоўскага, няхай і не дакладна ў ягоным, але ж вельмі блізкім ва ўсіх сэнсах будынку.
Не будзем забывацца, да прыкладу, што дом, дзе жыла сям'я Багдановічаў, не захаваўся, а літаратурны музей знаходзіцца ў іншым будынку той эпохі.
Некалькі пакойчыкаў музея Багдановіча добра адлюстроўваюць быт дарэвалюцыйнай Гародні. Дык чаму б не паўстаць у адным з прыватных дамоў Новага Свету аналагічнаму музею з атмасферай міжваеннага горада (узяўшы імя таго ж Яна Каханоўскага)?
Цяпер чытаюць
Бізнэсовец родам з Бабруйска адмовіцца ад свайго гіганцкага аўстралійскага заробку дзеля шанцу атрымаць $35 мільёнаў7
Каментары