Адвакат — гэта марнаванне грошай, а нічога добрага ад яго няма, лічыць палітвязень.
Бабуля зняволенага актывіста партыі Беларуская хрысціянская дэмакратыя Яўгена Васьковіча Тамара Уладзіміраўна расказала, што ўжо амаль два месяцы яна нічога не ведае пра лёс унука.
«14 верасня з Яўгенам у Магілёўскай турме № 4 сустрэўся старшыня абласной назіральнай камісіі пры Упраўленні юстыцыі аблвыканкама Віктар Сідарэнка. Перад сустрэчай я дала яму спіс з дзесяці пытанняў, якія прасіла задаць майму ўнуку. Я пыталася пра тое, за што яго кінулі ў карцар, ці атрымлівае ён нашы лісты, ці можа выпісваць газеты, хадзіць у турэмную бібліятэку і іншае. Калі Сідарэнка выйшаў, усё, што ён сказаў, — „у яго ўсё добра“. Так ён адказаў на ўсе дзесяць пытанняў. Але як у яго ў турме можа быць усё добра? Там жа не рай. Ці яму не даюць казаць, ці Сідарэнка недагаворвае», — сказала Тамара Васьковіч.
«Мы не ведаем, што з Яўгенам. З 3 жніўня я не атрымліваю ад яго лістоў.Ведаю толькі, што ён адмовіўся ад адваката. Кажа, што ён яму не патрэбны, што гэта марнаванне грошай, а нічога добрага ад гэтага няма. У студзені ў нас будзе з ім спатканне. Раз на год можна яму адпраўляць бандэроллю перадачу на 2 кілаграмы», — адзначыла бабуля палітвязня.
Нагадаем, 14 жніўня з Яўгенам Васьковічам сустрэўся праваабаронца Віктар Сідарэнка. Падставай для сустрэчы, якую арганізавала Упраўленне юстыцыі, сталі скаргі на парушэнне правоў арыштаванага актывіста ў пытаннях перапіскі з сваякамі і паплечнікамі. Відавочна, сустрэча была беспаспяховай, калі палітвязню да гэтага часу забараняюць слаць лісты.
Раней Яўген Васьковіч заяўляў, што не збіраецца пісаць прашэнне аб памілаванні. «Я памру, але прашэння не падпішу», — казаў ён.Палітвязня ў траўні 2011 года разам з Арцёмам Пракапенкам і Паўлам Сырамалотавым бабруйскі суд прызнаў вінаватым у падпале дзвярэй бабруйскага КДБ. Іх прысудзілі да сямі гадоў пазбаўлення волі ў калоніі ўзмоцненага рэжыму кожнага.
Каментары