Чатыры вагоны нябожчыкаў
Чатыры вагоны-маразільнікі з парэшткамі расейскіх вайскоўцаў днямі знайшлі ў Грозным. Трупы праляжалі там з 1996 году, з часоў папярэдняе чачэнскае вайны.
Месца, дзе стаялі гэтыя вагоны, раней належала растоўскай вайсковай лябараторыі, у якой спрабавалі ідэнтыфікаваць целы забітых. У маразільніках знаходзяцца трупы 154 асобаў. Пра гэта ў пятніцу паведаміла расейская тэлекампанія НТВ. Пасьля фармальнага замірэньня з чачэнцамі пра вагоны забылі. Як і пра сотні іншых расейцаў, што пагінулі тут у тыя гады без усякага сэнсу.
Флёра Малікава, намесьнік старшыні расейскага Камітэту салдацкіх мацярок, кажа, што гэтае адкрыцьцё яе ня дзівіць. Бо ў той самай лябараторыі, але ў Растове-на-Доне да сёньня замарожаныя і не пахаваныя парэшткі яшчэ некалькіх соцень расейскіх вайскоўцаў. Кошт іх генэтычнай экспэртызы складае пад паўмілёна даляраў. А гэта ж цана некалькіх мэрсэдэсаў, што паркуюцца ля Міністэства абароны ў Маскве. Аднак расейскія ўлады не падбалі нават пра тое, каб хоць у брацкай магіле пахаваць тыя целы, што ўжо не падлягаюць апазнаньню.
Нагадаем, што паводле інфармацыі намесьніка Генэральнага штабу, генэрала Валерыя Манілава, у новую чачэнскую вайну загінула 1458 расейскіх вайскоўцаў. Камітэт салдацкіх мацярок называе шматкроць большую лічбу. Колькі ж зь іх ужо ляжаць неапазнанымі ў маразільніках, ня ведае ніхто.
Што да чачэнцаў, дык іх ніхто й ня лічыць. Аднак, усясьветная арганізацыя Human Rights Watch днямі апублікавала рапарт, у якім прыводзяцца дакумэнтальныя сьведчаньні 38 расстрэлаў ні ў чым не вінаватых мірных жыхароў Чачэніі расейцамі. Пераважна гэта жанчыны й старыя. Што да палеглых маджахедаў, дык расейскія крыніцы называюць лічбу 10 тысяч.
Г.К.
Цяпер чытаюць
Прылукі пад Мінскам на хвалі хайпу — беларусы масава паехалі туды па здымкі ў стылі «Прыцемак». Мясцовыя не ў захапленні10
Прылукі пад Мінскам на хвалі хайпу — беларусы масава паехалі туды па здымкі ў стылі «Прыцемак». Мясцовыя не ў захапленні
«Людзі каментавалі, што сальманела ўвайшла ў чат». Беларус паехаў працаваць у Крэмніевую даліну — і стаў кулінарным блогерам на 28 мільярдаў праглядаў55
Каментары