Выпрабоўваючы цярплівасць народа, улады перайшлі крытычную рысу. Такое меркаванне ў інтэрв’ю БелаПАН выказаў вядомы беларускі паэт і грамадскі дзеяч Генадзь Бураўкін.
Ён лічыць, што расце бездань паміж меркаваннямі афіцыйнай прапаганды і нармальных грамадзян. "Гэта трывожна і нават небяспечна", - падкрэсліў паэт. Паводле яго слоў, афіцыйныя прапагандысты ў дзяржаўных СМІ ў апошні час перайшлі мяжу, за якой "наогул няма месца павазе да сваіх суграмадзян".
"Сёння з экранаў тэлевізараў мяне пераконвалі ў тым, што ніколі ў краіне не было такога спакою і адзінства ўлады з народам, як падчас сёлетніх прэзідэнцкіх выбараў. Аднак аб якім спакоі можна гаварыць, калі некалькі дзён таму высокімі дзяржаўнымі чыноўнікамі паведамлялася аб тым, што ў краіну закінуты нейкія баевікі і тэрарысты, якія планавалі выбухі школ і нават планавалі атруціць сістэмы водазабеспячэння настоямі са здохлых пацукоў? Таму або я не разумею вялікіх хітрасцей улады, або яна зусім заблыталася ў сваіх выдумках", - сказаў Г.Бураўкін.
Ён таксама лічыць, што ніколі краіна не бачыла столькі скандальна вядомых прыезджых дзеячаў. "І калі людзі такога кшталту, як Генадзь Селязнёў і Сяргей Бабурын бясконца выступаюць у перадачах дзяржаўных тэлеканалаў, узнікае адчуванне, што не беларусы выбіраюць свайго кіраўніка, а яны. Прычым выбіраюць чалавека, які патрэбны не беларусам, а ім", - зазначыў Г.Бураўкін.
На яго думку, афіцыйныя прапагандысты ці то неразумна перагнулі палку, ці то страцілі элементарнае разуменне таго, што такое выбары і давер народа. "Пра якую дэмакратычнасць выбараў можа ісці гаворка, калі са штаба аднаго з кандыдатаў арыштавалі амаль усіх актывістаў, а старшыня Цэнтрвыбаркама Лідзія Ярмошына замест роўнага і аб’ектыўнага стаўлення да ўсіх чатырох кандыдатаў займае адкрытую пазіцыю падтрымкі аднаго з іх?" - падкрэсліў Г.Бураўкін. Ён лічыць, што народ ужо не дазволіць уладам "доўга так нахабна сябе паводзіць".
Цяпер чытаюць
Бабарыка: Калі б мы перамаглі — вайны ва Украіне не было б6
Каментары