Здаецца, адбылося чарговае з'яўленне паўміфічнага ляснога ката беларусам. Спачатку звер забраўся ў вясковы куратнік, загрыз некалькі птушак, потым трапіў у пакінуты там капкан, а на наступны дзень таямніча знік (пакінуўшы пасля сябе грознае відэа і кучу курыных пёраў). Цяпер усе гадаюць, як гэта магчыма, піша Onliner.by.
Эпапея з лясным катом цягнецца не першы год. Лічылася, што апошні беларускі экзэмпляр быў забіты паляўнічым у 1927 годзе. Пакуль у 2017‑м падобная жывёла не была зафіксавана фотапасткай у беларускай частцы чарнобыльскай зоны (не вельмі выразна).
Сэрцам усе разумелі, што гэта менавіта ён, але для фармальнага пацверджання гэтага здымка тады аказалася недастаткова.
А 16 чэрвеня 2025 года лясны кот патрапіў на барсуковую фотапастку ў нацпарку «Прыпяцкі». Красаваўся там з усіх каціных сіл.
З тых часоў як у ваду кануў — нягледзячы на спробы вылічыць яго і здабыць хоць трошкі біяматэрыялу для аналізу.
Залез марадзёрнічаць
Пра чарговае меркаванае з'яўленне ляснога ката паведаміў натураліст-аматар Юрый Малец, які сам даведаўся пра ўсё ад відавочцы. Падзеі разгортваліся ў вёсцы Дзяржынск Лельчыцкага раёна. 14 сакавіка звера знайшлі ў сваім хляве мясцовыя жыхары: трапіў лапай у пакінуты капкан. Перад гэтым паспеў забіць шэсць курэй.
Капкан мацаваўся ланцугом да вертыкальна стаячай жэрдкі. Пакідалі яго ў разліку на куніцу ці тхара — трапіўся зусім унікальны персанаж.
Знік разам з капканам і ланцугом
Звера часова так і пакінулі ў хляве — «да высвятлення абставін». Гаспадары пайшлі на працу, калі вярнуліся, жэрдка валялася на зямлі, кот адсутнічаў. Кажуць, знік (разам з капканам і ланцугом) у прамежак часу з 5:30 да 7:00. Цяпер гадаюць, сам выкруціўся ці хто дапамог.
Засталося відэа, якое дае ўяўленне пра тое, як кот выглядаў.
У «Прыпяцкім» удакладнілі: гэта не «іх» экзэмпляр, відаць па афарбоўцы. Гэта значыць, магчыма, лясных катоў у Беларусі ўжо больш за аднаго.
Энтузіяст Малец спадзяецца, на месцы засталіся біялагічныя сляды зніклага звера (напрыклад, поўсць), па якіх можна будзе нарэшце фізічна пацвердзіць від жывёлы.
Цяпер чытаюць
Беларускі кладаўшчык са свастыкай на плячы лячыўся ад алкагалізму ў Сібіры і пайшоў ваяваць за Расію, а застаўся без выплат і працы10
Каментары