№ 4 (213), 22 — 29 студзеня 2001 г.
Адкрыты ліст Супраць пабудовы нафтаперапрацоўчага заводу
Мы, грамадзяне Беларусі, сябры шэрагу грамадзкіх аб’яднаньняў, дасылаем гэты ліст усім, каму неабыякавы лёс Беларусі, а таксама тым, хто павінен вырашаць праблему, аб якой гаворка пойдзе ніжэй.
27.09.2000 г. у выканкам Віцебску быў пададзены ліст супраць пагрозы, якая будзе парушаць экалягічную раўнавагу ў рэгіёне. Пагроза гэтая — пляны будаўніцтва голдзінгам “Лукойл” і Цюменскай нафтагазавай кампаніяй нафтаперапрацоўчага прадпрыемства ў СЭЗ “Віцебск”. Адказу на гэты ліст не было атрымана.
Расейскі бізнэс не цікавіцца тым, што ў нашай моладзі і насельніцтва ў цэлым катастрафічна горшае здароўе. Так сьведчаць справаздачы прызыўных мэдкамісіяў, а таксама вынікі штогадовых прафіляктычных аглядаў.
На гэтым фоне цынічна выглядае публікацыя ў гарадзкой газэце “Віцьбічы” ад 20 ліпеня 2000 г. У артыкуле малююцца прывабныя пэрспэктывы напаўненьня дзяржаўнага бюджэту на два мільёны даляраў штогод за кошт функцыянаваньня вышэйазначанага прадпрыемства. А ў якіх адзінках тады лічыць здароўе, якое будзе страчана жыхарамі Віцебску?
Сёньня наша дзяржава — самы буйны прадпрымальнік, які ўсё ўзяў у свае рукі, і, як вынікае з вышэйсказанага, ня думае аб здароўі шараговых грамадзянаў і лічыць толькі грошы ў “сваёй кішэні” (бюджэце).
Зыходзячы з гэтага і не спадзеючыся на вырашэньне дадзенага становішча ўладамі, група грамадзянаў Віцебску стварыла ініцыятыўную групу, якая ўжо сабрала каля пяцісот подпісаў супраць плянаў будаўніцтва экалягічна небясьпечнага прадпрыемства, і гэты збор мусіць працягвацца.
Мы патрабуем адмены гэтага праекту і падачы інфармацыі пра яго адмену ў сродках масавай інфармацыі.
У тым выпадку, калі нашыя законныя патрабаваньні ня будуць выкананыя, мы пакідаем за сабою поўную свабоду дзеяньня ў межах існуючага заканадаўства.
Аксімовіч Сяргей, Селюк Зьміцер, Уткіна Сьвятлана,
Прыходзька Барыс ды яшчэ сем подпісаў.
Дадатковую інфармацыю мажліва атрымаць у прадстаўнікоў ініцыятыўнае групы: Аксімовіча Сяргея (0212) 61-70-37, 210015, Віцебск, пр.Чарняхоўскага 9-47; Селюка Зьмітра (0212) 37-21-86, 210000, Віцебск,
вул.Суворава, 13-5.
Каментары