Судовая перамога “НН”
Вышэйшы гаспадарчы суд адмяніў папярэджаньне, вынесенае “Нашай Ніве” пракуратурай
Падставаю для папярэджаньня сталіся матэрыялы ў №1 і 2 за гэты год. Пад рубрыкай “Дзе варта быць” у №1 газэта надрукавала інфармацыю пра калядныя набажэнствы ў сталіцы. Пракуратура знайшла парушэньне ў згадцы пра службу Крыжаўзьвіжанскага прыходу аўтакефальнікаў у Курапатах. У №2 пракуратура зачапілася за Каляднае пасланьне Івана Спасюка, былога протаярэя Беларускай праваслаўнай царквы Маскоўскага патрыярхату, які, між іншага, пісаў, што “Беларуская аўтакефальная праваслаўная царква моліцца, каб Госпад сагрэў цяплом нашыя дамы, умацаваў нашае здароўе, вылечыў нашыя спустошаныя душы”. У гэтых згадках пра Аўтакефалію пракуратура ўбачыла распаўсюджваньне інфармацыі ад імя незарэгістраванай грамадзкай арганізацыі і публікацыю заведама недакладных зьвестак. Рэдакцыя не пагадзілася з папярэджаньнем, палічыўшы яго ідэалягічна матываваным. У пазове мы аргумэнтавалі сваё меркаваньне палажэньнямі Закону аб друку (нельга распаўсюджваць зьвесткі толькі “ад імя” незарэгістраванай арганізацыі). Адвакатка Тацяна Станкевіч з Цэнтру прававой абароны журналістаў БАЖ падмацавала яго дадатковым абгрунтаваньнем, знайшоўшы ў закідзе пракуратуры супярэчнасьць ня толькі Закону аб друку, але і Грамадзянскаму кодэксу (царква — рэлігійная, а не грамадзкая арганізацыя, а гэта не адно й тое самае). Прадстаўнік пракуратуры Станіслаў Новікаў у судзе рабіў акцэнт на тым, што “аўтакефальная царква — раскольніцкая арганізацыя, дзейнасьць якой накіраваная на разбурэньне ідэалягічнага і духоўнага міру ў рэспубліцы”, а “Маскоўская праваслаўная царква — катэгарычны праціўнік БАПЦ”. Судзьдзя Тамара Кітаева выслухала бакі і вынесла рашэньне: папярэджаньне скасаваць, а з пракуратуры спагнаць 200 тыс. рублёў за судовыя выдаткі.
Перамога “НН” — важны прэцэдэнт, які замацоўвае для СМІ магчымасьць паведамляць пра дзейнасьць незарэгістраваных арганізацый.
Рэдакцыя
Каментары