3 чэрвеня дэпутаты Фралоў, Скрабец і Парфяновіч абвясьцілі галадоўку ў знак пратэсту супраць неўнясеньня ў парадак работы сэсіі падрыхтаванага «рэспубліканцамі» законапраекту аб зьменах у выбарчае заканадаўства. Іншыя патрабаваньні — выпусьціць з турмы Міхаіла Марыніча і адмовіцца ад зьменаў у канстытуцыі аб трэцім тэрміне для Лукашэнкі. У звароце да дэпутатаў галадоўшчыкі заяўляюць, што гатовы разгледзець варыянт добраахвотнай адстаўкі Лукашэнкі і гарантаваць яму недатыкальнасьць, захаваньне маёмасьці, банкаўскіх рахункаў і вольны выезд з краіны.
У акцыі адчуваліся спантаннасьць, неарганізаванасьць і адсутнасьць за «рэспубліканцамі» агульнарэспубліканскай структуры. Спачатку дэпутаты начавалі на працоўных месцах у парлямэнце. Аднак паколькі Дом ураду быў блякаваны аховай, дэпутаты перабраліся на кватэру да Фралова.
4 чэрвеня да галадоўкі далучыліся актывісты АГП Марына Багдановіч і Генадзь Ананьеў. 5 чэрвеня — спроба разьбіць намёты ў двары дому генэрала Фралова. АМАП зьнёс намёты, Марыну Багдановіч і Генадзя Ананьева часова затрымалі. Сябры АГП Уладзімер Чырвоненка і (6 чэрвеня) Юры Істомін далучыліся да галадоўкі. 5 і 6 чэрвеня Валерыю Фралову двойчы выклікалі «хуткую». Лекар зафіксаваў перадынфарктны стан — у генэрала раней ужо быў інфаркт.
7 чэрвеня кватэру на Казарменным наведалі пасол АБСЭ Эбэргард Хайкен, паслы эўрапейскіх краінаў. Уночы з 7 на 8 чэрвеня камунальнікі зьнялі транспарант «За справядлівасьць. Не трэцяму тэрміну. Свабоду Марынічу» з балькону кватэры Фралова.
За транспарант у дачыненьні да Фралова заведзеная адміністрацыйная справа па артыкуле 143 ч.3 Адміністрацыйнага кодэксу за «самавольнае пераабсталяваньне, перафарбоўваньне бальконаў, лёджый і іншых архітэктурных элемэнтаў фасадаў жылых дамоў».
8 чэрвеня галадоўшчыкаў наведаў пасол ЗША Джордж Крол.
Раніцай затрыманыя шасьцёра маладафронтаўцаў, якія раздавалі каля Дому ўраду звароты галадоўшчыкаў да прадстаўнікоў сілавых структур, вэртыкальшчыкаў і дэпутатаў. У звароце — заклік дзейнічаць у рамках Канстытуцыі і здаровага сэнсу: «Самым заўзятым чыноўнікам… ня ўдасца пазьбегнуць адказнасьці. Таму прытрымлівайцеся закону і жывіце паводле сумленьня». Дэпутаты-галадоўшчыкі назвалі затрыманьне маладафронтаўцаў «незаконным» і папярэдзілі прадстаўнікоў улады аб адказнасьці за незаконныя дзеяньні. У галадоўшчыкаў зьявіўся ўласны інтэрнэт-сайт: www.inart.info. У першы ж дзень яго наведалі 837 чалавек.
На момант здачы нумару стала вядома, што 10 чэрвеня да галадоўкі далучыцца полацкі прадпрымальнік.
ВДз
Цяпер чытаюць
Хітры расіянін Яўген з жонкай і малым прыдумалі, як бясплатна пажыць у кватэры беларускі23
Каментары