Halloween
На календар зірнуць — і патрымцець крыху,
на зьмярканьні згадаўшы аб мёртвых і чараўніцах.
Сёньня калі і вынясуць гарбуза жаніху,
то гарбуза з вачніцамі й сьвечкамі ў вачніцах.
Поўнач яшчэ ня хутка — сьведчыць зімовы час,
ды на замшэлых могілках ажываюць паданьні.
Не перавёў гадзіньніка — і пасьпееш якраз
на вясельны абрад да пекнай нявесты-здані.
Хто рамантызм пасеяў, хутка зьбярэ ўраджай.
Што табе ў тым шкілеце, ваўкалаку, грыфоне?
Можа, усё яшчэ скончыцца добра, толькі зважай,
з кім займаешся сэксам па тэлефоне…
Хто яшчэ здольны пакінуць у люстэрку сьляды?
Усе мы ахвяры таемнага, халуі Хэлоўіну.
Хто дажыў да сьвітаньня — адсьвяткуе Дзяды,
дый астатнім няблага: зданяў — уся краіна.
31 кастрычніка — 1 лістапада 2004
Цяпер чытаюць
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»1313
Каментары