15 лістапада пры дапамозе авіяцыі Міністрэства па надзвычайных сітуацыях ва Ушачах усталявалі помнік на магіле народнага паэта Беларусі Рыгора Барадуліна.
Яшчэ ў 1995 годзе ў вершы «Прашэнне» Барадулін напісаў пра тое, каб на яго магіле замест помнікаў быў усталяваны валун з крыжом. Пра тое жаданне ён ізноў згадаў у інтэрв'ю журналісту Сяргею Шапрану ў 2011 годзе.
У ліпені 2015-га ў вёсцы Кублічы, дзе ў мясцовай школе навучаўся Васіль Быкаў, знайшоўся неабходны валун.
Выканкам дапамог яго перавезці. Ва Ушачах выдзелілі пляцоўку і стварылі ўсе ўмовы для працы скульптара Ігара Засімовіча.
Блізкія паэта вырашылі, што на тым камені мусіць быць Еўфрасіннеўскі крыж, бо сам Барадулін падкрэсліваў сваё паходжанне з Полаччыны.
Але як усталяваць валун, які важыць 2,5 тоны, на магілу? Барадулін ляжыць у цэнтры могілак. Машына туды не пад’едзе.
Старшыня Ушацкага райвыканкама Віктар Родзіч і Саюз беларускіх пісьменнікаў накіравалі просьбу на імя кіраўніка МНС Уладзіміра Вашчанкі. Той і даручыў кіраўніку авіяцыі Алегу Якаўлеву дапамагчы ў вялікай справе.
![](http://nashaniva.com/img/w732d4webp1/photos/z_2015_11/baradulin2_151116-w5zdh.jpg.webp)
Верталёт МІ-8 вылецеў з мінскага аэрадрома МНС у панядзелак удзень і праз паўгадзіны ўжо прызямліўся ва Ушачах. Да гэтага моманту два дзясяткі мясцовых жыхароў падрыхтавалі падмурак для помніка — па ланцугу перадалі рукамі 800 вёдзер з цэментам.
![](http://nashaniva.com/img/w732d4webp1/photos/z_2015_11/baradulin5_151116-6nbhm.jpg.webp)
![](http://nashaniva.com/img/w732d4webp1/photos/z_2015_11/baradulin3_151116-cngne.jpg.webp)
Валун паднялі верталётам і складаным віражом апусцілі паміж дрэвамі. На валуне месціцца толькі адзін надпіс «Рыгор Барадулін. Сын. 1935—2014».
![](http://nashaniva.com/img/w732d4webp1/photos/z_2015_11/baradulin4_151116-hvpi1.jpg.webp)
![](http://nashaniva.com/img/w732d4webp1/photos/z_2015_11/baradulin6_151116-tp06e.jpg.webp)
У 1995 г. Рыгор Барадулін напісаў верш «Прашэнне»
Калі я адыду, пастаўце мне
Валун сівы і крыж на валуне.
Засведчыць крыж,
Што адышоў з імшой
Паганец кшчоны,
Уніят душой.
Крумкач, як чорны плач,
На валуне
Спачне, і значыць,
Памяне мяне.
I стрыж, як крыж здранцвелы,
Прамільгне,
Цень студзячы ў труне
На самым дне.
Калі я замаўчу, пастаўце мне
Валун сівы і крыж на валуне…
Каментары