Каля 10 несанкцыянаваных дзіцячых летнікаў спынілі працу ў Беларусі
Каля 10 несанкцыянаваных дзіцячых лагераў спынілі сваю працу. Пра гэта паведаміла кансультант Галоўнага ўпраўлення выхаваўчай работы і маладзёжнай палітыкі Мінадукацыі Таццяна Асмалоўская, піша БелТА.
Таццяна Асмалоўская адзначыла, што з пачатку аздараўленчай кампаніі асаблівая ўвага надавалася прыватным аздараўленчым лагерам. «Наша задача — данесці да бацькоў і індывідуальных прадпрымальнікаў, арганізацый, якія ў канікулярны перыяд арганізуюць аздараўленне ці нейкія формы вольнага часу дзяцей, што ёсць пэўныя патрабаванні», — адзначыла яна.
Выканаўчыя камітэты актыўна праводзілі метадычную і інфармацыйную працу, тлумачачы нормы арганізацыі лагераў і формаў вольнага часу.
«Усё, што тычыцца бяспекі дзяцей, знаходзіцца ў полі зроку дзяржавы. Пры працы з дзецьмі неабходна выконваць патрабаванні, якія прад'яўляюцца дзяржаўнымі органамі. На жаль, каля 10 такіх несанкцыянаваных лагераў, якія былі выяўленыя ў гэты летні сезон, спынілі сваю працу», — распавяла Таццяна Асмалоўская.
Як дадаў начальнік аддзела дзяржаўных закупак і метадычнай работы рэспубліканскага цэнтра па аздараўленні і санаторна-курортным лячэнні насельніцтва Аляксандр Цай, больш уважліва трэба быць і бацькам, даведвацца, у якіх умовах будзе жыць дзіця, як будзе арганізавана яго харчаванне і якія будуць прымяняцца праграмы выхавання.
«Бацькі чамусьці давяраюць у тым ліку арганізатарам, якія зусім не хочуць выконваць устаноўленыя правілы арганізацыі выхаваўча-аздараўленчых лагераў», — падкрэсліў ён.
Аляксандр Цай расказаў, што сёлета была праведзена самая вялікая работа па выяўленні такіх арганізатараў. «Былі створаны рабочыя групы ва ўсіх рэгіёнах, нават у малых раёнах, з прадстаўнікамі мясцовых выканаўчых і распарадчых органаў, цэнтраў гігіены і эпідэміялогіі, МНС, пракуратуры, МУС і іншымі. Задзейнічаныя былі фактычна ўсе ведамствы і службы, і гэта дазволіла не дапусціць небяспечнага групавога знаходжання дзяцей», — рэзюмаваў ён.
Каментары