Сёньня стартуе плэй‑оф чэмпіянату Беларусі па хакеі. Ранейшыя туры рэгулярнага першынства ня маюць значэньня. Барацьба пачынаецца з нуля.
Тры верхнія радкі ў рэгулярцы занялі менскія «Керамін», «Дынама» і «Юнацтва» — яны й маюць найлепшыя шанцы на перамогу ў плэй-оф.
Сёлета мы рызыкуем убачыць апошні паўнавартасны першынство беларускай экстралігі. Налета зь ініцыятывы старшыні фэдэрацыі хакею і міністра ўнутраных справаў Уладзімера Навумава менскія «Юнацтва» і «Дынама» аб’ядноўваюцца, каб выступаць у вышэйшай лізе чэмпіянату Расеі з правам выхаду ў супэрлігу. Задума неадназначная, калі ўлічыць тэмпы зь якімі апошнія гады разьвіваўся ўнутраны беларускі чэмпіянат і рэгрэс расейскага. «Юнацтва» наогул сёлета стала пераможцам Кантынэнтальнага кубку. Беларускае першынство ж застанецца ва ўрэзаным выглядзе, бо ў ім будзе выступаць толькі дубль новага «супэрклюбу».
Адзінай сталічнай камандай, якая знайшла мужнасьць не падпарадкавацца, стаў «Керамін». Ня дзіўна, што паводле вынікаў апытаньня на сайце газэты "Прессбол" «За якую каманду вы будзеце заўзець у плэй‑оф», упэўнена перамагае менскі «Керамін». Заўзятары любяць сьмелых.
Менскае «Юнацтва» поўнае рашучасьці даказаць, што здольнае стаць чэмпіёнам краіны чацьвёрты раз запар. За леташні правал хоча рэабілітавацца «Дынама», «Керамін» выйграў рэгулярнае першынство. Амбітныя, як заўсёды, магілёўскае «Хімвалано», наваполацкі «Хімік‑СКА» і «Гомель». Хіба толькі жлобінскі «Мэталюрг» крыху вылучаецца з гэтага сьпісу, але сам факт выхаду каманды у чвэрцьфінал ужо ў першым сэзоне шмат пра што гаворыць.
На такі хакей сапраўды варта схадзіць і звадзіць туды сваіх дзетак, бо невядома, калі наступны раз беларускія аматары могуць паназіраць за такой інтрыгоўнай разьвязкай нацыянальнага першынства.
Каментары