Na centralnaj alei staličnaha parku imia 50-hodździa Kastryčnika ŭ 13.00 pačałasia dabračynnaja akcyja «Abarani i dapamažy!», prymierkavanaja da Mižnarodnaha dnia abarony žyvioł.
Akcyja arhanizavana hramadskim abjadnańniem abarony žyvioł «Ehida», paviedamlaje BiełaPAN.
Hałoŭnaja jaje meta — «vychavańnie ŭ ludziej pazityŭnych, dobrych pačućciaŭ u dačynieńni da bratoŭ našych mienšych, pryciahnieńnie ŭvahi da prablemy biazdomnych žyvioł Biełarusi, pošuk siemjaŭ dla biazdomnych žyvioł, jakija buduć pradstaŭleny na mierapryjemstvie», havorycca ŭ paviedamleńni «Ehidy».
Aktyvisty «Ehidy» i vałanciory pryviali ŭ park 100 katoŭ i sabak. Usie žyvioły pryščepleny, bolšaść ź ich — sterylizavanyja.
Toj, chto žadaje ŭziać žyviołu, pavinien mieć pašpart, a taksama pavadok i ašyjnik — dla sabaki, pieranosku abo sumku — dla kata. U ramkach mierapryjemstva ŭ parku projdzie kancert, konkursy dla dziaciej i darosłych, pracuje vystava dziciačych malunkaŭ «Źviarki — nie cacki».
U parku ŭstanoŭlena «Pałatka dapamohi», kudy možna prynieści rečy dla ŭtrymańnia žyvioł u prytułku: suchi korm, kansiervy, łatki dla katoŭ, napaŭnialnik dla tualetaŭ, srodki ad hlistoŭ i błoch, pieranoski dla katoŭ i ščaniat i h.d.
Arhanizatary prosiać minčan nie brać u park ułasnych žyvioł, kab paźbiehnuć kanfliktaŭ z sabakami i katami, jakija ŭdzielničajuć u akcyi. Akcyja budzie doŭžycca da 17 hadzin.
Ciapier čytajuć
Palčys, Andrejeva, Łojka i inšyja imiony — paśla vizitu amierykanskich dypłamataŭ u Minsk vyzvalili partyju palitviaźniaŭ7
Kamientary