Ceny na druhasnym rynku žylla ŭ Miensku i susiednich krainach stabilizavalisia na miažy pakupnickaj zdolnaści nasielnictva i mohuć pačać padać.
Na siońnia siaredniaja adnapakajovaja kvatera ŭ stalicy kaštuje kala $70000, pry canie $2059 za 1 kv.m. Dvuchpakajoŭka — $95000 (1980), trochpakajoŭka — $135000 (2000), a za čatyrochpakajovuju kvateru daviadziecca addać $166500 pry košcie 1kv.m $1990. Istotnych źmienaŭ nie nazirałasia ad pačatku leta.
U niekatorych susiednich krainach ceny na žyllo taksama stabilizavalisia, a ŭ Łatvii i Polščy pačali źnižacca. U Łatvii ad traŭnia da kastryčnika źnižeńnie skłała 10,6%. Adzin kvadratny metar u stalicy Łatvii kaštuje ŭ siarednim 2250 dalaraŭ. (Zarobki ŭ Łatvii prykładna ŭdvaja vyšejšyja za biełaruskija.)
Usio čaściej žychary Ryhi nabyvajuć žyllo dla siabie, a nie sa spekulatyŭnymi metami, adznačajuć łatyskija eksperty.
U Maskvie druhasny rynak žylla taksama pieražyvaje peryjad zacišša. Ceny ŭzrastajuć vielmi niaznačna i, jak adznačajuć u kampanijach nieruchomaści, hetaje padvyšeńnie jość usiaho tolki kampensacyjaj za padzieńnie kursu dalara. Na siońnia kvadratny metar maskoŭskich kvateraŭ kaštuje ŭ siarednim $4200.
Pik rostu cenaŭ u Kijevie naziraŭsia ŭ minułym hodzie. Tady kvatery ŭ siarednim padaraželi na 60%. Sioleta nazirałasia zamarudžvańnie rostu cenaŭ. A pačynajučy ź leta kijeŭskija kvatery zaŭvažna patańnieli. Tak žyllo ekanom-klasy patańnieła amal na 10%, kvatery z małoj žyllovaj płoščaj patańnieli na čverć. U nastupnym hodzie tendencyja źnižeńnia koštaŭ praciahniecca. Heta tłumačycca tym, što ceny na kvatery dasiahnuli miažy pakupnickaj zdolnaści nasielnictva.
Padmacoŭvajuć takija prahnozy kryzys ipateki ŭ ZŠA, a taksama stahnacyja rynku nieruchomaści ŭ Maskvie, jakaja nie ŭ małoj stupieni ŭpłyvaje na rynak Kijeva.
Varta adznačyć, što pryčynaj spynieńnia cenaŭ na mienskaje žyllo ajčynnyja eksperty taksama nazyvajuć pik pakupnickaj zdolnaści nasielnictva. U źviazku z hetym popyt na žyllo značna adstaje ad prapanovy. Pavodle niekatorych prahnozaŭ ceny na mienskaje žyllo da traŭnia mohuć źnizicca na 15-20%.
Ciapier čytajuć
35 maładych biełarusaŭ i biełarusak, za jakimi varta sačyć: apublikavany pieršy śpis Next 3522
Kamientary