Pavodle vynikaŭ pieršaha kvartała hetaha hoda skłałasia samaja nizkaja dola prodažu biełaruskich tavaraŭ z 2008 hoda — 65,7%, u tym liku charčovych tavaraŭ — 80,8%, niecharčovych — 45,8%.
Takija źviestki pryvioŭ premjer-ministr Biełarusi Andrej Kabiakoŭ 19 lipienia na pasiadžeńni prezidyuma Savieta ministraŭ, na jakim było razhledžanaje pytańnie ab mierach, što prymajucca pa impartazamiaščeńni i achovie ŭnutranaha rynku.
«U cełym my stracili 3,2 pracentnaha punkta da anałahičnaha pieryjadu minułaha hoda», — cytuje premjera pres-słužba ŭrada.
Jon adznačyŭ, što heta vynik u tym liku nievykanańnia ŭ poŭnym abjomie zajavak na pastaŭku ŭ handlovuju sietku šerahu kandytarskich vyrabaŭ AAT «Čyrvony mazyranin», AAT «Konfa», STAA «Pieršaja šakaładnaja kampanija», enierhaźbierahalnych lampaŭ Bresckaha elektralampavaha zavoda, elektraaparatury, abmiežavanaha asartymientu zapatrabavanych na ŭnutranym rynku tkanin i vyrabaŭ ź ich Aršanskaha lnokambinata i AAT «Rečycki tekstyl», hadzińnikaŭ Minskaha hadzińnikavaha zavoda. Kiraŭnik urada taksama adznačyŭ prablemy z pastaŭkami na spažyviecki rynak łaminavanych padłohavych pakryćciaŭ, myła Hrodzienskaha tłuščavaha kambinata.
Pavodle słoŭ Kabiakova, nazirajecca nizkaja markietynhavaja, u tym liku rekłamnaja, aktyŭnaść vytvorcaŭ, niezacikaŭlenaść va ŭdziele ŭ cenavych skidkach, akcyjach, pramaakcyjach i inšych mierapryjemstvach pa prasoŭvańni mučnych, kandytarskich vyrabaŭ, karamieli, aleju, kansiervaŭ dla dziciačaha charčavańnia.
«Pytańniaŭ da vytvorcaŭ i handlu adnosna asartymientu tavaraŭ i jaho prodažu nazapasiłasia niamała», — zajaviŭ premjer-ministr. Jon zapatrabavaŭ padčas pasiadžeńnia prezidyuma Saŭmina padać vyčarpalnuju spravazdaču pa hetych pytańniach.
Kiraŭnik urada dadaŭ, što ŭ Biełarusi sfarmiravanaja i realizujecca «dziejsnaja sistema pa achovie ŭnutranaha rynku». U pieršuju čarhu, pavodle słoŭ Kabiakova, heta tyčycca spynieńnia handlu kantrafaktnymi tavarami lohkaj pramysłovaści. Dla pradprymalnikaŭ dziejničaje zabarona na handal bieź siertyfikataŭ i supravadžalnych dakumientaŭ, padkreśliŭ jon. Praciahvajecca žorstki kantrol za vykanańniem techrehłamientaŭ, pravodziacca sistemnyja pravierki. Meta hetaj pracy — zabiaśpiečyć achovu zakonnych pravoŭ spažyŭcoŭ na nabyćcio jakasnaha tavaru. Ustanoŭlenaja nieabchodnaść prachodžańnia imparciorami pa asobnych tavarach sanitarna-hihijeničnaj ekśpiertyzy. Zhodna z rašeńniem kiraŭnika dziaržavy stvorany novy antymanapolny orhan — Ministerstva antymanapolnaha rehulavańnia i handlu, nahadaŭ premjer. «Ad pracy hetaha viedamstva my čakajem peŭnych vynikaŭ, u tym liku ŭ pytańni achovy ŭnutranaha rynku», — padkreśliŭ Kabiakoŭ.
Razam z hetym, adznačyŭ jon, najbolš efiektyŭny instrumient u baraćbie za rynak — heta nie administracyjnyja miery, a vysokaja jakaść ajčynnaj pradukcyi, šyroki asartymient i kankurentnaja cana, pravilnaje pazicyjanavańnie tavaru na rynku i jaho rekłama.
Babaryka try chviliny adkazvaŭ na pytańnie, čyj Krym. Tak i nie adkazaŭ86
Kamientary