Niezvyčajny kancert va ŭtulnaj chatniaj atmaśfiery adbyŭsia ŭ staličnaj prastory «Kvaternik» u niadzielu.
Muzyki hurta Re1ikt apranulisia ŭ chałaty i navat pižamny kaścium dynazaŭra dy prezientavali słuchačam svaje najlepšyja kampazicyi ŭ cikavych kamiernych aranžyroŭkach na bazie studyi «MuzŠok». Zvyčajna tam ludzi vučacca hrać na muzyčnych instrumientach, ale čas ad času škoła pieratvarajeca ŭ kancertnuju placoŭku, dzie ŭ farmacie kvaternika hrajuć viadomyja biełaruskija muzyki.
«Kali my pierajechali z Homiela ŭ Minsk, dyk davali šmat «kvaternikaŭ» prosta ŭ siabie doma. Ludziam vielmi padabalisia tyja kancerty. A jak my daŭno ŭžo ničoha padobnaha nie rabili, vyrašyli pryhadać tyja časy, kab znoŭ blizka paŭzajemicca z našymi słuchačami. Nasamreč ža heta byŭ paŭnacenny akustyčny kancert, ale najpierš my namahalisia stvaryć utulnuju chatniuju atmaśfieru: pa-svojsku apranulisia, zapalili lampy-načniki, častavalisia harbataj ź piečyvam», — kaža lidar hurta bubnač Alaksandr Dziemidzienka.
Treba adznačyć, što publicy byŭ pa sercy taki farmat imprezy, kali možna ŭładkavacca na pledzie dy zamović lubimuju pieśniu, a taksama zapytacca ŭ muzykaŭ pra što zaŭhodna.
Nastupny vystup Re1ikt adbudziecca 12 žniŭnia ŭ histaryčnym centry Minska ŭ ramkach prajektu «Piešiechodka». Heta budzie vialiki solny dabračynny kancert z volnym uvachodam.
Re1ikt — hurt, jaki pracuje ŭ napramku world rock, spałučajučy tradycyjny biełaruski piesienny falkłor z aktualnymi rok-napramkami. U kampazicyjach kamandy splalisia paleski šamanizm, aŭtentyčny drajv i tajamničy biełaruski kosmas. Kalektyŭ źjaŭlajecca ŭładalnikam šerahu muzyčnych uznaharod u Polščy i Biełarusi, vystupaŭ va Ukrainie, u Litvie, Rasii.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ86
Kamientary