Va Ukrainie ŭpieršyniu zatrymali hramadzianina Biełarusi za ŭdzieł u bajavych dziejańniach na baku «DNR»
Zatrymanamu pahražaje da 15 hadoŭ źniavoleńnia. Proźvišča pakul nie nazyvajuć. Heta pieršaje zatrymańnie hramadzianina Biełarusi za ŭdzieł u bajavych dziejańniach na baku tak zvanych DNR i ŁNR, piša Radyjo Svaboda.
Specsłužby Ukrainy zatrymali na padkantrolnaj Kijevu terytoryi Danieckaj vobłaści hramadzianina Biełarusi, jaki vajavaŭ na baku ŭzbrojenych farmavańniaŭ samaabvieščanaj «Danieckaj narodnaj respubliki» — u składzie bataljona «Samali» i braŭ aktyŭny ŭdzieł va ŭzbrojenych sutyknieńniach z ukrainskim vojskam.
«Hramadzianinu Biełarusi paviedamili ab padazreńni ŭ ździajśnieńni kryminalnaha złačynstva, praduhledžanaha častkaj 1 artykułu 258-3 Kryminalnaha kodeksu Ŭkrainy. Sud zadavoliŭ chadajnictva prakuratury Danieckaj vobłaści i abraŭ dla jaho mieru strymańnia ŭ vyhladzie ŭtrymańnia pad vartaj terminam na dva miesiacy. Dasudovaje raśśledavańnie praciahvajecca», — paviedamiŭ presavy sakratar Hieneralnaj prakuratury Ŭkrainy Andrej Łysienka.
Artykuł 258-3 Kryminalnaha kodeksu Ŭkrainy (stvareńnie terarystyčnaj hrupy abo terarystyčnaj arhanizacyi) praduhledžvaje pakarańnie pazbaŭleńniem voli na termin ad vaśmi da piatnaccaci hadoŭ. Proźvišča zatrymanaha biełarusa nie nazyvajuć.
Pavodle Andreja Łysienki, hramadzianin Biełarusi trapiŭ u šerahi «DNR» u listapadzie 2014 hoda. «Atrymaŭšy zvańnie «starejšy siaržant», jon pačaŭ vajennuju słužbu ŭ 1-m asobnym tankavym bataljonie «Samali» na pasadzie kamandzira tanka, za što štomiesiac atrymlivaŭ hrašovuju ŭznaharodu», — skazaŭ Andrej Łysienka.
Pavodle prakuratury, biełarus taksama braŭ aktyŭny ŭdzieł u zachopie Danieckaha aeraporta ŭ 2015 hodzie.
Presavy sakratar HPU dadaŭ, što paśla ŭdziełu ŭ vajskovych dziejańniach u 2015 hodzie biełarus pakinuŭ słužbu, adnak u 2017 hodzie viarnuŭsia i byŭ zaličany ŭ adnu z vajskovych častak «DNR».
«Sioleta, 10 žniŭnia, dla praciahu svajoj supraćpraŭnaj dziejnaści jon prybyŭ na terytoryju Ŭkrainy, dzie i byŭ vykryty supracoŭnikami SBU i prakuratury», — dadaŭ Andrej Łysienka.
Kamientary