Užo treci hramadzianin Rasii ŭčyniŭ samahubstva praz pahrozu vysyłki z Biełarusi

Stała viadoma ŭžo pra treci za apošnija dva miesiacy vypadak samahubstva hramadzianina Rasiei, źviazanaha mierkavana z pahrozaj vysyłki ź Biełarusi. 31 śniežnia 2018 hodu skončyŭ žyćcio 68-hadovy žychar Brahinskaha rajonu Mikałaj Dziemidzienka, piša Radyjo Svaboda.

«Jon mieŭ jašče saviecki pašpart, nijak nia moh zrabić novy. Raniej Mikałaj žyŭ u Karelii, to mahli vysłać u Rasieju, bo ŭ jaho byli tut administracyjnyja pravaparušeńni», — zaznačyła adna z krynic Svabody, blizka znajomaja z sytuacyjaj.

Jon naradziŭsia tut

Mikałaj Dziemidzienka naradziŭsia ŭ vioscy Vuhły Brahinskaha rajonu. Potym pierajechaŭ žyć u Kareliju. Kala dvanaccaci hadoŭ tamu viarnuŭsia na radzimu — u viosku Chrakavičy. Tut u jaho žyŭ starejšy brat. Mikałaj mieŭ jašče saviecki pašpart, novy nijak nie moh zrabić.

U jaho byli prablemy z alkaholem.

«Papiery jamu źbirali, kab jon atrymaŭ pašpart. Milicyja navat zapyty dasyłała ŭ Rasieju, pa apošnim jaho miescy žycharstva. Pašpart ža jaho byŭ aformleny ŭ Rasiei. Ale jon złoŭžyvaŭ alkaholem, tamu nia moh dać rady aformić dakumenty.

U jaho byli štrafy za administracyjnyja pravaparušeńni — źjaŭleńnie ŭ niećviarozym stanie ŭ hramadzkim miescy. Pierš treba było štrafy spłacić», — kažuć u Čamiaryskim sielskim saviecie, na terytoryi jakoha znachodzicca vioska Chrakavičy.

«Nikomu jon škody nie prynosiŭ, byŭ cichim pjanicam»

U sielsaviecie zaznačyli, što Chrakavičy znachodziacca ŭ čarnobylskaj zonie, za 5—6 kilametraŭ ad miažy z Ukrainaj.

«Sami razumiejecie, tut pamiežnaja zona, zakanadaŭstva źmianiajecca, uzmacniajecca. Paśla avaryi na ČAES u nas tut nabudavali domikaŭ dla pierasialencaŭ, i tamu siudy ciahnuła ludziej, jakija niedzie badzialisia pa śviecie, a tut mahli asieści», — kažuć u sielskim Saviecie.

Tam dadajuć, što Mikałaj nikomu nie prynosiŭ škody, byŭ «cichim pjanicam». Dapamahaŭ viaskoŭcam z apracoŭkaj aharodaŭ, zajmaŭsia inšymi sielskahaspadarčymi pracami.

«Jon nikoha nie turbavaŭ, nichto na jaho ŭ vioscy nie skardziŭsia. Kab jon kraŭ, ci bujaniŭ, dakučaŭ kamu — takoha nie było. My kazali — rabi pašpart, budzieš pensiju atrymlivać, ale jon abiacaŭ, a potym napjecca i ŭsio. Kab nie alkahol — to nie było b takich prablem. Ale my chryścijanie, nam škada ludziej, usich.

Kudy jamu było vysialacca, dy siarod zimy? U čystaje pole? Tym bolš tut brat, u Rečycy brat, u Homli siastra ŭ jaho. Nu pra takoje nie kazali, što jaho vyviezuć u čystaje pole. Chacia adnu žančynu pasadzili niejak u ciahnik i adpravili na Picier», — patłumačyli ŭ sielskim saviecie.

«Zakanadaŭcy, źmianiajcie zakon, kali jon idzie nie ad žyćcia»

Pravaabaronca Leanid Sudalenka źviaraje ŭvahu, što za apošni čas heta treci vypadak samahubstva, źviazany z pahrozaj vysyłki ź Biełarusi.

U śniežni 2018 z pryčyny vysyłki ź Biełarusi ŭčyniŭ samahubstva 35-hadovy žychar Łojeva (Homielskaja vobłaść) Siarhiej Barysaŭ.

U studzieni ŭ Buda-Kašaloŭskim rajonie taksama ŭčyniŭ samahubstva hramadzianin Rasiei. Vital žyŭ u Biełarusi 14 hadoŭ, mieŭ tut žonku i šeść dziaciej, pracavaŭ na miasakambinacie. Za administracyjnyja pravaparušeńni jamu pahražała vysyłka. Dzieci zastalisia sirotami.

«Kali takoje zdarajecca, užo b mianiali zakony, jakija dazvalajuć za adno pravaparušeńnie vysyłać čałavieka, jak u vypadku z ukraincam Siarhiejem Pracenka. Jon maje žonku, małych dziaciej, pracu, stanoŭčyja charaktarystyki. Chto vyjhraje, kali jaho vyšluć va Ŭkrainu? — kaža pravaabaronca Leanid Sudalenka. — Rušycca siamja — rušycca ŭsie.

Dla mužčyny heta vielmi stresavaja sytuacyja. Pracenka kaža: što ja, siadu na vakzale ŭ Čarnihavie i budu siadzieć? Jamu niama kudy iści va Ŭkrainie. Jon hublaje sacyjalnyja suviazi, siamju», — padkreśliŭ pravaabaronca.

Pravaabaronca zaklikaje zakanadaŭcaŭ «nia spać u šapku».

«Kali zakon idzie nie ad žyćcia — to treba źmianić zakon, bo ludzi, jak my bačym, nie mohuć samastojna spravicca z prablemaj i nakładajuć na siabie ruki», — dadaŭ Sudalenka.

Rašeńnie pa ŭkraincu Siarhieju Pracenku, jakomu pahražaje vysyłka, budzie vyniesienaje 7 lutaha ŭ Homielskim abłasnym sudzie.

«Ja apuściŭ ruki». Jašče adzin mužčyna, jakomu pahražała vysyłka ź Biełarusi, skončyŭ žyćcio samahubstvam

• 0
• 0
• 0
• 0
• 0
• 0
• 0
• 0