Pravaabaronca pra spravu Cichanoŭskaha: Artykuł 342 KK maje «słaŭnuju» historyju prymianieńnia pa palityčnych spravach
Artykuł 342 Kryminalnaha kodeksa, pa jakim vystaŭlena abvinavačvańnie Siarhieju Cichanoŭskamu i jašče siemiarym zatrymanym na pikiecie ŭ Hrodnie, maje ŭ Biełarusi «słaŭnuju» historyju prymianieńnia pa palityčnych spravach. Takoje mierkavańnie ŭ kamientary TUT.BY vykazaŭ pravaabaronca Valancin Stefanovič.
Stefanovič nahadvaje: u 2005 hodzie pa art. 342 sudzili Paŭła Sieviarynca i Mikałaja Statkieviča za arhanizacyju vuličnych akcyj u kastryčniku 2004 hoda suprać vynikaŭ refierendumu pa źmienie Kanstytucyi. Sud pastanaviŭ, što z-za dziejańniaŭ palitykaŭ spyniŭsia hramadski transpart — demanstranty na niekalki chvilin vyjšli na prajeznuju častku. Za heta Sieviarynca i Statkieviča pakarali tryma hadami «chimii», pa amnistyi termin skaracili da dvuch hadoŭ prosta ŭ sudzie. Pa hetym ža artykule sudzili ŭdzielnikaŭ «Płoščy-2010»: kandydata ŭ prezidenty Uładzimira Niaklajeva, Nastu Pałažanku, Andreja Dźmitryjeva, Alaksandra Fiadutu, Irynu Chalip i inšych.
U situacyi ź Cichanoŭskim Śledčy kamitet zajaviŭ, što ŭ Hrodnie było arhanizavana praviadzieńnie niezakonnaha hramadskaha mierapryjemstva, mitynhu, padčas jakoha ździejśnieny hrupavyja dziejańni, jakija hruba parušajuć hramadski paradak i spałučanyja ź vidavočnym niepadparadkavańniem zakonnym patrabavańniam milicyi.
— Ale, hledziačy videa z Hrodna, my bačym, što Cichanoŭski arhanizoŭvaŭ nie hrupavyja dziejańni, jakija hruba parušajuć hramadski paradak, a pikiet pa zbory podpisaŭ, jaki prachodziŭ u adpaviednaści z Vybarčym kodeksam u miescy, nie zabaronienym Hrodzienskim vykankamam. Tak, možna traktavać, jak Lidzija Jarmošyna, što heta byŭ nie pikiet pa zbory podpisaŭ, a niesankcyjanavanaje masavaje mierapryjemstva, ale heta ŭsio vielmi sprečna ŭ kantekście taho, što my pačuli, što ŭ nas daterminovaj ahitacyi ŭ zakanadaŭstvie niama, jak akazvajecca, i možna pra kaho zaŭhodna kazać usio što zaŭhodna. I pretenzii, što na pikietach vykazvajucca drenna pra prezidenta… Nu prabačcie, a prezident pra inšych pa televizary vykazvajecca, i heta narmalna, nu, a ludzi vykazvajucca na pikietach, — kaža Stefanovič.
Pravaabaronca taksama źviartaje ŭvahu na toje, što, miarkujučy pa videa, Cichanoŭski sam nikoha na pikiecie ŭ Hrodnie nie pravakavaŭ. Naadvarot — pravakavali jaho. A supracoŭniki milicyi paviali siabie nieprafiesijna.
— Vidavočna, što ŭ kahości było žadańnie zładzić niejki ruch, kab pryciahnuć uvahu supracoŭnikaŭ milicyi. Dalej my bačyli zusim niezakonnyja i nieprafiesijnyja dziejańni supracoŭnikaŭ milicyi. Hramadzianka zajaviła, što Cichanoŭski nie adkazaŭ na jaje pytańnie. Milicyjant u pieršuju čarhu pavinien byŭ vyśviatlić ŭ hramadzianki, ci ździajśnialisia ŭ dačynieńni da jaje jakija-niebudź supraćpraŭnyja dziejańni albo nie, ci bili jaje, abražali albo jašče niešta. Kali nie — milicyjant pavinien byŭ syści, a nie chapać Cichanoŭskaha za ruki, a potym padać na ziamlu, — ličyć pravaabaronca.
Dziejańni, jakija padpadajuć pad č. 1 art. 342, — heta nie ciažkaje złačynstva, farmalna jana dazvalaje trymać ludziej pad padpiskaj ab niavyjeździe. Ale da Cichanoŭskaha i astatnich zatrymanych užyty aryšt, kab jany nie mahli ŭdzielničać u pieradvybarčaj kampanii, ličyć pravaabaronca.
— Artykuł 342 «humavy», i ŭžyvać jaho vielmi zručna. I, viadoma, zrazumieła, čamu abranaja miera strymańnia ŭtrymańnie pad vartaj na dva miesiacy — Cichanoŭski praviadzie ŭ SIZA ŭsie vybary. Ale sudovych pierśpiektyŭ ja tut nie baču i dapuskaju, što paśla vybaraŭ sprava budzie zakrytaja, usich adpuściać. Tut treba ŭličvać hieapalityčnyja momanty. Tak što dapuskaju, što tut budzie jak u 2017 hodzie, kali kryminalnyja spravy pazačyniali i ŭsich vypuścili, — kaža Stefanovič, nahadvajučy pra spravu «Biełaha lehijona», raspačatuju ź lista «frau A.» prezidentu.
900 tysiač dalaraŭ, znojdzienyja u Cichanoŭskich na dačy, uviazać z art. 342 tearetyčna možna, ličyć pravaabaronca, ale, chutčej za ŭsio, jany prosta naohuł «vypaduć» sa spravy.
— Navat kali vykazać zdahadku, što heta hrošy Cichanoŭskaha i jon źbiraŭ ich na praviadzieńnie kampanii, to ŭsio narmalna. Finansavy hod u nas nie zavieršany, jon zaviaršajecca ŭ sakaviku, kali pavinny dekłaravacca dachody i naličvacca padatki na ich. Tamu, kali heta tak, hrošy pavinny viarnuć zakonnamu ŭładalniku, a ŭ nastupnym sakaviku jon zapłacić ź ich padatki. Ale, viadoma, składana skazać, my nie viedajem, što napisana ŭ abvinavačvańni. Moža, tam napisana, što jon za hetyja hrošy arhanizoŭvaŭ «hrupavyja dziejańni, jakija parušajuć hramadski paradak». Ale znoŭ ža, miarkujučy pa videa, navat kali zychodzić ź viersii śledstva, to dziejańni atrymalisia niejkija spantannyja, a nie arhanizavanyja. Cichanoŭski što, pradbačyŭ, što źjavicca hetaja dama i budzie da jaho čaplacca z pytańniami? — razvažaje Valancin Stefanovič.
Pravaabaronca ličyć, što hrošy byli instrumientam prapahandysckaj manipulacyi, kab pradstavić Cichanoŭskaha ŭ niavyhadnym śviatle.
Hladzicie, my znajšli ŭ jaho na dačy 900 tysiač dalaraŭ! Jon zusim nie praściačok, piensijanieram raspaviadaje, što žyć tut drenna, a pad kanapaj zachoŭvaje takija sumy. Tamu ja nie ździŭlusia, kali hetyja hrošy ŭ spravie naohuł nijak nie buduć fihuravać. U 2018 hodzie ŭ jakaści dokazu pa spravie «rastvaryŭsia» aŭtamat, znojdzieny ŭ bahažniku, kryminalny pieraśled Łazoŭskaha spynili. Aŭtamat takaja reč, što jon albo jość, albo jaho niama, ale adkul jon uziaŭsia ŭ mašynie, tak nichto i nie skazaŭ. Tak što pahladzim, što budzie z hetymi hrašyma, — padsumoŭvaje Stefanovič.
Kamientary