Cichanoŭskaja: Chto addaść zahad ab uvarvańni va Ukrainu, paŭstanie pierad trybunałam. Chto vykanaje zahad — budzie adkazvać
Lidar demakratyčnaj Biełarusi Śviatłana Cichanoŭskaja paviedamiła, što da jaje pastupaje infarmacyja ab mahčymym uvarvańni vojskaŭ Biełarusi va Ukrainu. Z hetaj nahody jany źviarnułasia da biełaruskich vajskoŭcaŭ. Pryvodzim hałoŭnyja tezisy.
1. Alaksandr Łukašenka ŭžo ździejśniŭ dziaržaŭnuju zdradu, pradastaviŭšy terytoryju Biełarusi dla rasijskaj ahresii suprać Ukrainy.
Hetaja ahresija supiarečyć nacyjanalnym intaresam Biełarusi i źjaŭlajecca złačynstvam, a taksama prama supiarečyć Kanstytucyi Respubliki Biełaruś. Jon i ŭsie słužbovyja asoby, jakija sadziejničajuć ahresii, nieminuča paŭstanuć pierad sudom i paniasuć pakarańnie za dziaržaŭnuju zdradu, a ŭ vypadku ŭvarvańnia va Ukrainu — i za vajennyja złačynstvy.
2. Uvarvańnie biełaruskaj armii va Ukrainu — heta krok ź niezvarotnymi nastupstvami.
Jon stanie haniebnaj plamaj na adnosinach z ukrainskim narodam i jašče bolš izaluje biełarusaŭ ad źniešniaha śvietu — ažno da žaleznaj zasłony, za jakoj Biełaruś nie buduć razhladać jak samastojnuju dziaržavu, a žyćcio ŭ krainie pryjdzie da halečy.
3. Usie, chto addaść zahad pra ŭvarvańnie vojskaŭ Biełarusi va Ukrainu, niezaležna ad pasady i voinskaha zvańnia, paŭstanuć pierad trybunałam.
4. Usie, chto vykanaje hety zaviedama złačynny zahad, buduć adkazvać pierad zakonam.
5. Vajskoŭcy i lubyja słužbovyja asoby, jakija admovilisia vykonvać złačynnyja zahady, vyzvalajucca ad adkaznaści za ich nievykanańnie.
Prava nie vykonvać zaviedama złačynnyja zahady harantavanaje Zakonam. Zafiksavać svaju niazhodu z zahadam možna pramym dziejańniem — skłaŭšy zbroju.
6. Vajskoŭcy, słužbovyja asoby i hramadzianie Biełarusi, jakija lubymi dastupnymi sposabami praduchilili vykanańnie złačynnych zahadaŭ, vyzvalajucca ad adkaznaści.
7. Vajskoŭcy, jakija pakinuli pole boju abo zdalisia ŭ pałon va Ukrainie, vyzvalajucca ad adkaznaści.
8. Zahad uvieści vojski va Ukrainu — heta nie tolki zahad adpravić na viernuju śmierć vajskoŭcaŭ našaj krainy, ale i zahad usim nam, biełarusam, admovicca ad niezaležnaści i svajoj budučyni.
- Alaksandr Łukašenka niekalki razoŭ abiacaŭ, što biełaruskija vajskoŭcy nie buduć vajavać va Ukrainie. Ale analityki miarkujuć, što jon nie zmoža supraćstajać, kali Rasija naležnym čynam naciśnie.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary