Anamalii ŭ sudovaj sistemie: mnostva palityčnych stachanaŭcaŭ zvolniłasia pa ŭłasnym žadańni
Vyjšaŭ ukaz Łukašenki ab pryznačeńni i źniaćci sudździaŭ. U hetym ukazie jość anamalii — źniata šmat udarnikaŭ pa palityčnych spravach, jakija tysiačami vydavali sutki sumlennym biełarusam i na dziesiacihodździ adpraŭlali ŭ kałonii. Pry hetym niekatoryja adyjoznyja sychodziać pa ŭłasnym žadańni.
Łukašenka pryznačaje sudździaŭ svaimi ŭkazami dla taho, kab trymać ich u zaležnaści. Pierad hetym jany prachodziać strohi klirynh z boku słužbaŭ biaśpieki. Adno z hałoŭnych adroźnieńniaŭ Biełarusi ad demakratyčnych krain — u tym, što sudovaja ŭłada ŭ nas całkam zaležyć ad vykanaŭčaj, jak, zrešty, i zakanadaŭčaja ŭłada, i dziaržaŭnyja ŚMI.
Zdymaje sudździaŭ taksama Łukašenka. Dla hetaha moža być niekalki pryčyn — sychod pa ŭłasnym žadańni, skančeńnie terminu pryznačeńnia biez nastupnaha pierapryznačeńnia, a taksama vysłuha hadoŭ.
Pahladzieli, što za niečakanyja kadry nie byli pierapryznačanyja, syšli ŭ adstaŭku i napisali zajavy pa ŭłasnym žadańni.
Kanstancin Kaladaŭ
«U suviazi sa skančeńniem terminu paŭnamoctvaŭ» ad pasady sudździ suda Vilejskaha rajona źniaty Kanstancin Kaladaŭ.
Jak sudździa Kaladaŭ najpierš viadomy aktam biesčałaviečnaści — jon «za kamientary» prysudziŭ 5 hod strohaha režymu maładziečancu Paŭłu Kučynskamu, u jakoha čaćviortaja stadyja raku.
Profil Kaladava na «Zubry» pamiataje i inšyja jaho ŭčynki.
Pamiatajecca, naprykład, kali jon adpraviŭ na sutki mamu maleńkich dziaciej. Akazałasia, hety sudździa prosta nie viedaŭ, što zakon heta zabaraniaje.
Aksana Kopač
Aksana Kopač — stachanaŭka Baranavickaha suda. U jaje profili na «Zubry» tolki nievialikaja častka palityčnych prysudaŭ. U realnaści Kopač naležyć centralnaje miesca ŭ kanviejery baranavickich sudoŭ, kali ludziej dla zapałochvańnia chapali ni za što, a potym Kopač štampavała prysudy «za raspaŭsiud ekstremisckich materyjałaŭ».
Źniali jaje ŭ suviazi sa skančeńniem terminu paŭnamoctvaŭ.
Ina Kachanoŭskaja
Ina Kachanoŭskaja, sudździa Maładziečanskaha rajona, syšła pa ŭłasnym žadańni. Kachanoŭskaja, pierapryznačanaja ŭ kastryčniku 2020-ha na piać hadoŭ, dobra razumieła, što ad jaje patrabujecca.
Kachanoŭskaja asudziła niekalki palitviaźniaŭ. Tak, maładziečancu Viktaru Taŭhieniu Kachanoŭskaja dała dva hady chimii za toje, što 9 žniŭnia jon trymaŭ u rukach kałonku z muzykaj.
Paŭtara hoda kałonii z-pad małatka Kachanoŭskaj atrymaŭ inšy maładziečaniec, Juryj Biruk.
Častku viadomych hramadskaści prysudaŭ Kachanoŭskaj možna pahladzieć na jaje staroncy ŭ sistemie «Zubra».
Što zmusiła jaje napisać zajavu pa ŭłasnym žadańni, nieviadoma.
Taćciana Lińnik
Maładaja sudździa Pieršamajskaha rajona Minska Taćciana Lińnik źniataja ŭ suviazi sa skančeńniem terminu paŭnamoctvaŭ.
Lińnik śpiecyjalizavałasia na sutkach i štrafach.
Svaimi rašeńniami jana vykraśliła z žyćcia apanientaŭ łukašyzmu jak minimum 436 sutak, i jak minimum na 32 800 rubloŭ spustošyła kišeni biełaruskich pratestoŭcaŭ.
Na jaje sumleńni jak minimum dva palitviaźni — Illa Turkoŭ i Łarysa Tankaškur.
Čamu jaje nie pierapryznačyli — nieviadoma.
Ihar Zmuško
Ihar Zmuško z suda Žłobinskaha rajona syšoŭ pa ŭłasnym žadańni. Jon nie dabyŭ da kanca 5-hadovaha terminu, byŭšy pryznačanym u kastryčniku 2020-ha.
Pa siońniašnich časach dyk Zmuško — davoli humanny sudździa.
Na jaho sumleńni piać z pałovaj vydadzienych hadoŭ chatniaj chimii, štrafy i sutki. Naprykład, jon sudziŭ Arcioma Barašku za vyčarpalny kamientaryj da dziejańniaŭ hancavickaha daišnika Ihara Volniča — try hady chimii i 700 rubloŭ kampiensacyi.
Vital Kazakievič
Kazakievič byŭ sudździoj Ašmianskaha rajona. Navat tam było čym adznačycca (chacia sam Kazakievič vynosiŭ palityčnyja prysudy zadoŭha da 2020-ha).
Jahony profil na «Zubry» pamiataje 194 vydadzienyja dni sutak i 10 tysiač vydadzienych štrafaŭ. A taksama niekalki hadoŭ chimii.
Vital Kazakievič vyzvaleny ad pasady ŭ suviazi z sychodam u adstaŭku.
Stanisłaŭ Lašenka
Stanisłaŭ Lašenka byŭ sudździoj Horackaha rajona i, zdavałasia b, išoŭ pa žyćci davoli sumlenna, ale napiaredadni svajho sychodu ŭ adstaŭku spatyknuŭsia — na 2 hady i 10 miesiacaŭ pieravioŭ na turemny režym palitviaźnia Mikałaja Dziadka.
Juryj Maškietaŭ
Maškietaŭ — sudździa Maskoŭskaha rajona Minska, jaki vielmi chutka z vydačy sutak pierajšoŭ na štampoŭku prysudaŭ, jakija adpraŭlali ludziej za kraty na hady.
Tolki «sutkami» jon vynies bolš za tysiaču prysudaŭ, bo manitorynhavyja sistemy ŭličvajuć tolki častku prysudaŭ, pra jakija stanovicca viadoma publična.
Svaimi rašeńniami pa kryminalnych spravach Maškietaŭ pałamaŭ nie adzin los.
Maškietaŭ vyrašyŭ napisać zajavu pa ŭłasnym žadańni.
Alaksandr Sićko
Alaksandr Sićko z suda Kastryčnickaha rajona Hrodna syšoŭ u adstaŭku. Jon viadomy pieradusim tym, što paśladoŭna i istotna palapšaŭ materyjalnaje stanovišča biespracoŭnaj «infakazački» Volhi Bondaravaj, na karyść jakoj spahnaŭ 1000 rubloŭ «maralnaj kampiensacyi» z asudžanaha palitviaźnia Vasila Pilca i jašče 1000 rubloŭ — z palitviaźnia Vadzima Płaŭskaha.
Alaksandr Tarakanaŭ
Alaksandra Tarakanava źniali z pasady staršyni suda Škłoŭskaha rajona ŭ suviazi sa skančeńniem terminu paŭnamoctvaŭ.
Jon adznačyŭsia tym, što «dakinuŭ» jašče paŭtara hoda kałonii palitviaźniu Paŭłu Aŭčarovu.
Maryna Fiodarava
Jašče adna sudździa z suda Savieckaha rajona Minska źniataja pa vychadzie ŭ adstaŭku. U sudovaj sistemie daŭni kadr — pracavała z 1996-ha.
Tolki sutkami jana pakarała ludziej za palityku jak minimum na 2874 dni. Kałonijami i chimijami — na dziesiacihodździ.
Piatro Cyhanok
Pajšoŭ u adstaŭku taksama staršynia suda Čačerskaha rajona.
Najbolšaje jaho «dasiahnieńnie» ŭ karjery, pa jakim jaho zapomniać, — adpraŭka troch maładych anarchistaŭ na 2,5 hoda kałonii za paru nalepak sa znakam anarchii i słovami «Čas vyrašać samim».
Ciapier čytajuć
Ci varta kuplać zakinutuju chatu za adnu bazavuju i kolki heta kaštuje nasamreč? Voś što raskazvajuć ludzi4
Ci varta kuplać zakinutuju chatu za adnu bazavuju i kolki heta kaštuje nasamreč? Voś što raskazvajuć ludzi
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie7777
Kamientary