Maci, jakaja straciła dźviuch dačok u DTZ pad Oršaj, asudzili na try hady źniavoleńnia. Za jaje prosiać zastupicca

U TikTok źjaviŭsia zvarot da Alaksandra Łukašenki i sudovaj sistemy Biełarusi nakont losu žycharki Dubroŭna, jakaja straciła dźviuch dačok u strašnaj avaryi 14 śniežnia 2024 hoda. Pavodle słoŭ aŭtara videa, žančynu asudzili na try hady pazbaŭleńnia voli, ź jakich bolš za hod jana ŭžo adbyvaje. Mužčyna ličyć, što strata dziaciej sama pa sabie stała dla maci pažyćciovym pakarańniem, i aburajecca tym, što jana, pavodle jaho śćviardžeńnia, nie moža raźličvać na amnistyju, umoŭna-daterminovaje vyzvaleńnie abo pamiłavańnie, piša kanał «Vitiebsk, ja hulaju!».

Trahiedyja adbyłasia kala vioski Staŭry Aršanskaha rajona. Aŭtamabil Volkswagen Golf źjechaŭ u kiuviet i ŭrezaŭsia ŭ dreva. Zahinuli dźvie dački žančyny — 14 i 17 hadoŭ, jašče try čałavieki atrymali ciažkija traŭmy.

Pavialičyć

Charakterna, što pieršapačatkova MUS paviedamiła, nibyta za rulom znachodziŭsia 20‑hadovy małady čałaviek. Tolki amal praz čatyry miesiacy Śledčy kamitet ustanaviŭ, što aŭtamabilem kiravała jaho 38‑hadovaja maci. Siamja viartałasia z paminak jaje baćki. Syn užyvaŭ ałkahol, tamu žančyna, jakaja była ćviarozaj, sieła za rul.

U červieni 2025 hoda SK abviaściŭ ab zaviaršeńni rasśledavańnia. Ekśpiertyza ŭstanaviła, što aŭtamabil ruchaŭsia z chutkaściu kala 63 kiłamietraŭ za hadzinu pry dazvolenych 90 kiłamietrach za hadzinu. Pry hetym zadnija zimovyja šyny byli znošanyja, a pasažyry na zadnim siadzieńni nie byli pryšpilenyja. Śledčyja zafiksavali ślady zanosu aŭtamabila, ale publična nie paviedamili, ci daśledavałasia rola stanu darohi ŭ avaryi.

Žančynie vystavili abvinavačańnie pavodle častki 3 artykuła 317 KK (parušeńnie praviłaŭ darožnaha ruchu abo ekspłuatacyi transpartnych srodkaŭ, jakoje paciahnuła pa nieaściarožnaści śmierć dźviuch abo bolš asob). Jak śćviardžaje aŭtar zvarotu, jaje asudzili na try hady źniavoleńnia.

Zvarot vyklikaŭ burnuju dyskusiju — pad rolikam užo bolš za 700 kamientaroŭ. Adny ličać prysud praźmierna surovym, a niemahčymaść daterminovaha vyzvaleńnia — niespraviadlivaj. Inšyja, naadvarot, miarkujuć, što pakarańnie zanadta miakkaje, pakolki zahinuli dva čałavieki. Dziasiatki kamientataraŭ uzdymajuć pytańnie ab adkaznaści darožnych słužbaŭ: mužčyna ŭ zvarocie śćviardžaje, što aŭtamabil trapiŭ u śniežny pieramiot. Ludzi pytajucca, čamu pakarali tolki kiroŭcu, jakaja ruchałasia z paraŭnalna nievialikaj chutkaściu, i ci praviarałasia adkaznaść tych, chto pavinien byŭ zabiaśpiečvać biaśpiečny stan darohi.

Niekalki kamientataraŭ paviedamili pra jašče adnu trahiedyju ŭ siamji asudžanaj. Pavodle ich słoŭ, na minułym tydni pamierła jaje maci — babula dźviuch zahinułych dziaŭčynak. Aŭtary kamientaroŭ źviazvajuć jaje śmierć z rašeńniem suda, pryniatym niezadoŭha da hetaha na čarhovym pasiadžeńni pa spravie jaje dački. Što mienavita pastanaviŭ sud, nieviadoma.

• 0
• 0
• 0
• 0
• 0
• 1
• 1
• 0