Nazvali 10 samych cichich haradoŭ śvietu. Usie jany znachodziacca ŭ Jeŭropie

Ekśpierty Avanti praanalizavali rejtynh 100 najlepšych turystyčnych haradoŭ śvietu (Top 100 City Destinations Index) kampanii Euromonitor International za 2025 hod. Sa śpisu vyklučyli napramki, zakrytyja dla svabodnaha naviedvańnia, a taksama pazicyi, jakija tyčylisia cełych rehijonaŭ, a nie asobnych haradoŭ. Kožny horad aceńvali ŭ radyusie dvuch kiłamietraŭ ad jaho aficyjnaha centralnaha punkta ŭ OpenStreetMap abo ad budynka meryi, kali taki punkt adsutničaŭ.

Zatym daśledčyki paraŭnali praciahłaść aŭtamahistralaŭ i bujnych daroh z praciahłaściu piešachodnych vulic. Pieravahaj ličyłasia mienšaja kolkaść ažyŭlenych mahistralaŭ i bolšaja praciahłaść piešachodnych zon. Akramia taho, harady ź pieršaj dziasiatki pravieryli na najaŭnaść «pravił zachavańnia cišyni»: ci dziejničajuć tam ustanoŭlenyja zakonam hadziny cišyni, načnaja kamiendanckaja hadzina, abmiežavańni na načnyja rejsy ŭ hałoŭnym aeraporcie abo zabarona na pracu kram pa niadzielach.

Pavialičyć

Top-10 samych cichich haradoŭ śvietu (pavodle viersii Avanti Travel Insurance):

• Vieniecyja (Italija) — bolš za 170 km piešachodnych zon i poŭnaja adsutnaść aŭtamabilaŭ u histaryčnym centry.
• Lisabon (Partuhalija) — nizkaja ščylnaść bujnych daroh i zabarona na načnyja avijarejsy.
• Amsterdam (Niderłandy) — bolš za 30 km vulic biez aŭtamabilaŭ i spakojnyja maršruty ŭzdoŭž kanałaŭ.
• Barsiełona (Ispanija).
• Brusiel (Bielhija).
• Afiny (Hrecyja).
• Ciurych (Šviejcaryja).
• Miłan (Italija).
• Fłarencyja (Italija).
• Stakholm (Šviecyja).

Choć u pieršaj dziasiatcy całkam daminujuć jeŭrapiejskija harady, ekśpiertka ŭ śfiery padarožžaŭ Sara Radryhies taksama nazvała svaje ŭlubionyja spakojnyja napramki na inšych kantynientach dla tych, chto hatovy adpravicca dalej. U jaje śpis uvajšli Chajan (Vjetnam), vostraŭ Łamu (Kienija), štat Ńju-Mieksika (ZŠA), Paraci (Brazilija) i Nelsan (Novaja Ziełandyja).

Trojka lidaraŭ

Lidarkaj śpisu stała Vieniecyja, dzie ŭ radyusie dvuch kiłamietraŭ ad centra analityki naličyli ŭsiaho kala dvuch kiłamietraŭ ažyŭlenych daroh. Dziakujučy bolš čym 170 kiłamietram całkam piešachodnych vulic, cichija kanały, histaryčnyja płoščy i źvilistyja zavułki horada dazvalajuć paznajomicca ź vieniecyjanskaj architekturaj i kulturaj biez zvykłaha darožnaha šumu.

Pavodle słoŭ Radryhies, hety horad idealna padychodzić dla tych, chto choča adpačyć ad hułu aŭtamabilaŭ, pakolki na bolšaj jaho častcy niama aŭtamabilnaha ruchu. A prahułki na dośvitku dazvalajuć ubačyć toj spakojny bok Vieniecyi, jaki turysty zvyčajna nie zaŭvažajuć.

Druhoje miesca zajmaje Lisabon, jaki vyłučajecca adnoj z samych nizkich siarod udzielnikaŭ daśledavańnia ščylnaściaŭ ažyŭlenych daroh. Akramia taho, u miascovym aeraporcie dziejničajuć abmiežavańni na načnyja rejsy.

Stalica Partuhalii pryciahvaje architekturaj, azdoblenaj tradycyjnaj plitkaj azuležu, histaryčnymi tramvajami, šyrokimi krajavidami raki Težu i šmatlikimi zialonymi zonami. Usio heta dazvalaje lohka sumiaścić kulturnuju prahramu sa spakojnym adpačynkam.

Dla hetaha Radryhies rekamienduje ŭklučyć u maršrut sady Fondu Hałusta Hiulbienkiana, nazyvajučy ich vydatnym miescam, dzie možna adpačyć i dałučycca da mastactva.

Trojku lidaraŭ zamykaje Amsterdam, dzie naličvajecca bolš za 30 kiłamietraŭ vulic biez aŭtamabilaŭ, a maršruty ŭzdoŭž kanałaŭ dazvalajuć vyvučać horad u spakojnym tempie.

Pavialičyć

Akramia znakamitych vodnych arteryj i muziejaŭ, u roznych rajonach stalicy Niderłandaŭ možna znajści niezaležnyja kramy, utulnyja kaviarni i adčuć miascovy kałaryt u niazmušanaj atmaśfiery.

Radryhies raić padarožnikam spačatku vyvučyć asablivaści roznych rajonaŭ, pierš čym vybirać žyllo. Pa-za miežami samaha centra možna znajści značna bolš cichija i prydatnyja miescy dla adpačynku paśla praciahłych prahułak.

• 0
• 0
• 0
• 0
• 0
• 0
• 0
• 0