«Upeŭnienaja, što jany buduć pakaranyja». Siastra Ramana Bandarenki — pra šeść hadoŭ paśla jahonaj śmierci

11 listapada 2020 hoda 31‑hadovy Raman Bandarenka vyjšaŭ u dvor svajho doma, dzie ludzi ŭ cyvilnym zrazali bieł-čyrvona-biełyja stužki, jakija stali simvałam pratestaŭ suprać Łukašenki. Mužčyny schapili Ramana, źbili jaho i advieźli ŭ milicyju. Na nastupny dzień jon pamior u balnicy.

Pavodle stryječnaj siastry Ramana Volhi Kučarenka, za šeść hadoŭ siamja ŭ peŭnaj stupieni navučyłasia žyć z hetaj strataj. Ale bol nikudy nie źnik.

«My z mamaj Romy pastajanna na suviazi, pastajanna pieraasensoŭvajem usio, što adbyłosia, z nadziejaj na toje, što ludzi, jakija ŭčynili heta złačynstva, kali-niebudź buduć pakaranyja», — kaža Volha.

«Heta strata zastajecca na ŭsio žyćcio niezahojnaj ranaj»

Volha raskazała pra toje, jak ciapier žyvie maci Ramana:

«Jana trymajecca, ale, naturalna, heta strata zastajecca na ŭsio žyćcio niezahojnaj ranaj. Bo viarnuć blizkaha, rodnaha syna nichto, viadoma, nie ŭ stanie. Nijakija novyja sensy, mety i zaniatki».

Pa słovach Volhi, navat praz šeść hadoŭ ludzi naviedvajuć mahiłu Ramana Bandarenki ŭ Biełarusi. Jany prynosiać kvietki, prybirajuć i paviedamlajuć rodnym, što byli tam.

«Vielmi časta ludzi pišuć, što prychodzili, naviedvali Romu, pakinuli kvietki, prybralisia. Ludzi pamiatajuć. Unačy ciotka Lena [maci Ramana] dasyłała, što jana jakraz była ŭ Romy na mahiłcy, i tam byli kvietki, i niejkija cukierki ludzi pakidali, i žyvyja i štučnyja kvietki».

Asabliva šmat ludziej, pavodle jaje, prychodzić u pamiatnyja daty — u dzień naradžeńnia Ramana i ŭ hadavinu jahonaj śmierci. Dla maci Ramana heta nie tolki maralnaja, ale i praktyčnaja padtrymka. Kali jana nie moža sama naviedać mahiłu, inšyja ludzi mohuć pahladzieć, ci ŭsio tam u paradku, i pry nieabchodnaści niešta papravić.

«Jana razumieje, što jana nie adna z hetaj trahiedyjaj, i ŭžo navat praz stolki hadoŭ jana tym nie mienš bačyć, što ludzi nieabyjakavyja, nie zabylisia, i dla ich heta važna», — padkreślivaje Volha i dadaje, što ludzi taksama rehularna pišuć maci Ramana i padtrymlivajuć jaje.

«Heta vielmi ŭsialaje nadzieju i navat natchniaje, što ludzi takija adkrytyja, sumlennyja, z takimi dobrymi čałaviečymi jakaściami».

Pavialičyć

Niahledziačy na toje, što prajšło ŭžo šeść hadoŭ, pa słovach Volhi Kučarenki, siamji ničoha nie viadoma pra zruchi ŭ rasśledavańni śmierci Ramana.

«Pa hetaj častcy ŭvohule poŭny nul, nichto nie paviedamlaŭ pra niejkija tam zruchi. Uvohule ničoha niama».

Siarod mahčymych datyčnych da napadu inicyjatyva ByPol nazyvała tahačasnaha kiraŭnika Fiederacyi chakieja Dźmitryja Baskava, kikbaksiora Dźmitryja Šakutu i pres-sakratarku Łukašenki Natallu Ejsmant. Pavodle rasśledavańnia ByPol, śmiarotnyja traŭmy Ramanu nanieśli bajcy SACHRa.

Siastra Ramana miarkuje, što realnyja źmieny ŭ spravie mohuć adbycca tolki paśla źmien u samoj Biełarusi. Na pytańnie, ci zrazumieła joj, chto mienavita vinavaty ŭ śmierci brata, Volha adkazała stanoŭča.

«Asabista dla mianie heta nie patrabuje rasśledavańnia. Mahčyma, u niejkich niuansach jašče daviadziecca razabracca, ale mnie ŭsio zrazumieła, piersanalna kožny dla mianie zrazumieły. Heta było viadoma adrazu. Ja ŭpeŭnienaja, što jany buduć pakaranyja, inšaje pytańnie — čas».

12 listapada 2020 hoda pry trahičnych abstavinach pamior 31‑hadovy minčuk Raman Bandarenka. Žychara «płoščy Pieramien» u Minsku (dvor na skryžavańni vulic Čarviakova, Kachoŭskaj i Smarhoŭskaha trakta) vykrali i pabili prychilniki Alaksandra Łukašenki, jakija zrazali tam bieł-čyrvona-biełyja stužki.

U balnicu Ramana zavieźli z RUUS Centralnaha rajona Minska z aciokam hałaŭnoha mozhu i šmatlikimi traŭmami. Nazaŭtra jon pamior.

Chto mienavita zabiŭ Ramana Bandarenku, nieviadoma. Adnak siarod prysutnych padčas napadu 11 listapada 2020 hoda na zapisach z kamier nazirańnia paznali Dźmitryja Baskava, nieadnarazovaha čempijona śvietu pa tajskim boksie i kikboksinhu Dźmitryja Šakutu i pres-sakratarku Łukašenki Natallu Ejsmant.

Spačatku Śledčy kamitet Biełarusi zajaviŭ, što Raman Bandarenka nibyta byŭ pjany. Paśla žurnalisty i miedyki abvierhli heta. 18 lutaha 2021 hoda, na soty dzień paśla śmierci Ramana, Hienprakuratura paviedamiła jaho maci Alenie Bandarency, što pa fakcie śmierci jaje syna pačali kryminalnuju spravu. 17 vieraśnia 2021 hoda spravu prypynili «z pryčyny nieŭstanaŭleńnia asoby, jakaja padlahaje pryciahnieńniu ŭ jakaści abvinavačanaha».

13 listapada 2020 hoda na partale Tut.by byŭ apublikavany artykuł, dzie na padstavie miedycynskich dakumientaŭ paviedamlałasia, što ŭ kryvi zabitaha Ramana Bandarenki nie było ałkaholu. 19 listapada zatrymali aŭtarku artykuła, žurnalistku Kaciarynu Barysievič, i doktara balnicy chutkaj miedycynskaj dapamohi Arcioma Sarokina. Kaciarynie Barysievič prysudzili 6 miesiacaŭ kałonii i štraf u 2900 rubloŭ, doktaru Arciomu Sarokinu — dva hady z adterminoŭkaj na hod i štraf 1450 rubloŭ.

• 0
• 0
• 0
• 0
• 0
• 0
• 0
• 0