Kala miažy ź Biełaruśsiu niamieckija vajskoŭcy ŭpieršyniu vyprabavali na vučeńniach drony-kamikadze
Na palihonie Rudninkaj u Litvie niamieckija vajskoŭcy ŭpieršyniu praviali taktyčnyja vyprabavańni dronaŭ-kamikadze. Bieśpiłotniki nakiroŭvali na tanki, ale dla testaŭ vykarystoŭvali bajavyja častki biez vybuchoŭki. Taksama tam vyprabavali sistemu štučnaha intelektu, jakaja dapamahaje znachodzić celi, paviedamlaje Reuters.

Vyprabavańni prajšli 22 listapada ŭ miežach Freedom Shield — najbujniejšych na siońnia niamieckich vajskovych vučeńniaŭ u Litvie. Vykarystoŭvali drony niamieckich vytvorcaŭ Helsing i Stark.
Takija bieśpiłotniki mohuć peŭny čas znachodzicca ŭ pavietry nad vyznačanym rajonam, a zatym atakavać cel i vybuchnuć pry ŭdary. Rasija i Ukraina ŭžo šyroka vykarystoŭvajuć ich na vajnie. Hiermanija paśla šmathadovych sprečak uchvaliła zakupku takoj zbroi tolki ŭ 2025 hodzie.
Za vyprabavańniami naziraŭ kiraŭnik suchaputnych vojskaŭ Hiermanii Kryścijan Frojdynh.
Za niekalki dzion da hetaha na palihonie ŭpieršyniu prateściravali Clarity — prahramu kampanii Helsing dla vyznačeńnia celaŭ z dapamohaj štučnaha intelektu. Jana analizuje vialikija abjomy źviestak sa spadarožnikaŭ, dronaŭ i inšych datčykaŭ i prapanoŭvaje varyjanty dziejańniaŭ. Frojdynh nazvaŭ abiedźvie technałohii niezamiennymi dla sučasnaj vajny.
U Rudninkai i Rukle raźmiaščajecca novaja niamieckaja 45‑ia tankavaja bryhada. Da kanca 2027 hoda jana pavinna naličvać kala 5000 vajskoŭcaŭ i 2000 mašyn, u tym liku dziasiatki tankaŭ. Kala 1800 niamieckich vajskoŭcaŭ užo znachodziacca ŭ Litvie.
Kamientary