Zavadčanin z Homiela staŭ zorkaj tyktoku dziakujučy raspakoŭcy ssabojek, jakija jamu źbiraje na pracu žonka
Rusłan Bahdanovič skaryŭ sacsietki tym, jak piaščotna raskładvaje na haziecie kantejniery ź ježaj, jakuju pryhatavała lubimaja žonka.

Na tyktok hamielčuka Rusłana Bahdanoviča padpisana bolš za 44 tysiačy čałaviek. Jon nie pakazvaje hłamurnaha žyćcia i nie raskazvaje pra paśpiachovy pośpiech.
Mužčyna pracuje adrazu na dvuch zavodach. Miarkujučy pa fotazdymkach u jaho sacsietkach, adzin ź ich — heta Homielski tłuščavy kambinat. Na pracu žonka źbiraje Rusłanu ssabojki — mienavita na ich jon robić sakavityja ahlady, na trasiancy apisvajučy niemudarhielistyja, ale apietytnyja stravy. Taki voś «mišlen» u abiedzienny čas!

Samy papularny rolik nabraŭ 2,2 miljona prahladaŭ i amal 47 tysiač łajkaŭ.
«Mojva smažanaja. Pra mojvu heta asobnaja razmova. Nie mahu ŭtrymacca, kab nie źjeści jaje. Voś heta tema! Chleb z kaŭbasoj usiamu hałava! Chleb ź viandlinaj usiamu hałava! Bliny. Cieščyny ahuročki. Bulba biełaruskaja. Piečyva ŭ kletačku. Sadavina. Nu i na ŭsiaki vypadak «Rołtan», — demanstruje ŭ videa Rusłan svaje bahaćci.
Kamientatary ŭ zachapleńni. Niechta, praŭda, udakładniaje — na kolki dzion Rusłan pajšoŭ z domu na pracu. Vyśvietliłasia, što zapasy ŭsiaho na vosiem hadzin.
Šmat chto žartuje: «Ja mužu skazała, što heta štučny intelekt», «Pakul tarmazok źjasi, užo i pracavać niama kali budzie, damoŭ para iści», «Zdajecca, jana jaho nazaŭsiody adpraviła».
Raniej u intervju mužčyna raskazvaŭ, što pieršaje videa źniaŭ dla dački — i niečakana staŭ zorkaj tyktoku. Pryznavaŭsia, što blizkija spačatku ličyli jaho chobi, miakka kažučy, dziŭnym. Ale kali roliki stali zalatać na miljony prahladaŭ i Rusłana pačali paznavać na vulicy, rodnyja źmianili svajo mierkavańnie.
Na pytańnie pra trasianku mužčyna adkazvaŭ, što sapraŭdy razmaŭlaje tak u paŭsiadzionnym žyćci — heta nie vobraz dla sacsietak.

Darečy, Rusłan śćviardžaje, što jaho błoh zaŭvažyŭ ziamlak — skandalna viadomy treš-błohier Miełstroj. Zavadčanin raspaviadaŭ u tyktoku, što toj u 2024 hodzie padaryŭ jamu mašynu (na joj mužčyna niadaŭna trapiŭ u DTZ) i kanviert z hrašyma — byccam by za ščyraść.
A letaś užo Rusłan prademanstravaŭ toŭsty stos dalaraŭ — kazaŭ, što taksama padarunak ad Miełstroja.
«Andrucha, ty sapraŭdy chočaš, kab u mianie serca spyniłasia. U mianie trasiecca ŭsio ŭnutry, žonka taksama ŭsia ŭ pierapałochu, usie ŭ šoku, nie viedajem, što rabić. Iznoŭ heta ŭsio na noč hledziačy… Ziamlak, ty sapraŭdy chočaš mianie zahnać u mahiłu. Voś byŭ by ty pobač, ja b ciabie ścisnuŭ tak. Daj Boh tabie zdaroŭja, kab u ciabie pa žyćci ŭsio było dobra. Dziakuj. Ty majo žyćcio padniaŭ na novy ŭzrovień», — raspaviadaŭ u videa Rusłan.
Z taho momantu Rusłan nazyvaje Miełstroja Andrej-Cudatvorac. Praŭda, siarod kamientataraŭ chapaje skieptykaŭ, jakija nie vierać u toje, što treš-błohier sapraŭdy moh asypać darahimi padarunkami zavadčanina.
Kamientary