Hramadstva

Vadzim Hałyhin: Ja krychu stamiŭsia ad humaru. Chočacca pasprabavać niešta inšaje

Vadzim Hałyhin u intervju jutub-kanału Fametime TV raskazaŭ, čamu kaliści pakinuŭ Comedy Club, kolki zarabiŭ na rekłamie i čamu stamiŭsia ad humaru.

Vadzim Hałyhin. Skryn videa: FAMETIMETV / YouTube

Vadzimu Hałyhinu 50 hadoŭ. Prasłaviŭsia jon u KVZ: u 2001 hodzie razam z kamandaj BDU vyjhraŭ Vyšejšuju lihu. U 2005‑m staŭ rezidentam Comedy Club na rasijskim TNT. Paśla byli ŭłasnaja pradziusarskaja kampanija, kino, teleprahramy i amal dva dziasiatki hadoŭ u rekłamie sietki techniki «Eldarada».

Hałyhin pakinuŭ Comedy Club u 2007 hodzie, kali šou tolki nabirała papularnaść. Tady kazali, što jon z kimści pasvaryŭsia abo atrymlivaŭ mała efiru. Sam jon doŭha admoŭčvaŭsia ale ŭ intervju ŭrešcie skazaŭ, što sapraŭdy adbyłosia:

«My damaŭlalisia pra niejkija rečy ŭ płanie finansaŭ, i hetyja damoŭlenaści nie byli vykananyja. I skazali, što ŭ pierśpiektyje nie atrymajecca hetaha zrabić. Havorka išła pra raźmierkavańnie dolaŭ va ŭłasnaści na sam pradukt. Z taho boku byli svaje dovady, u mianie — svaje arhumienty. Ja skazaŭ: dobra, tady ja pajdu».

Kanflikt, padkreślivaje Hałyhin, byŭ nie z kanałam, a ŭnutry kamandy: TNT, naadvarot, byŭ hatovy vykonvać lubyja pažadańni rezidentaŭ. Jon taksama kaža, što na raźvitańnie pradziusar šou Artur Tumasian paprasiŭ jaho nie zabirać z saboj nikoha z kaleh, i jon heta paabiacaŭ.

Na momant sychodu, jak adznačaje Hałyhin, jon užo zachapiŭsia mahčymaściu realizavać svaju daŭniuju maru:

«Ja sustreŭ adnadumcaŭ, ź jakimi my syšlisia na tym, što nam zaŭsiody chaciełasia trapić u čaroŭny śviet kino».

«Heta była nie zusim dziciačaja kazka»

Novyja partniory, pavodle Hałyhina, byli zamožnymi prychilnikami Comedy i na šou vykuplali cełyja stały. Ź imi jon zasnavaŭ studyju Ego Production i zadumaŭ sieryju parodyj pad brendam «Očień russkoje»: kino, kazku i detektyŭ. «Mnie zdavałasia, što ja prydumaŭ cełuju impieryju», — iranizuje jon ciapier.

Impieryja nie skłałasia. Pieršy film, pavodle Hałyhina, pradali Comedy Club Production, i jon vyjšaŭ pad nazvaj «Samyj łučšij film». Film sabraŭ niemałuju kasu, ale dystrybucyjaj zajmałasia ŭžo Comedy, jakaja na im i zarabiła. «Očień russkij dietiektiv», natchniony tryleram «Siem», pradziusar vypuskaŭ sam i asabista jeździŭ ź im pa haradach-miljońnikach.

Samym darahim prajektam pavinna była stać kazka, biudžet jakoj tady acanili ŭ bolš jak 12 miljonaŭ dołaraŭ. Pa słovach Hałyhina, dyrektar «Maśfilma» Karen Šachnazaraŭ, pabačyŭšy eskizy zamkaŭ Kaščeja, abiacaŭ vyzvalić pad zdymki terytoryju kinastudyi. Da zdymak tak i nie dajšło, i siońnia aŭtar zadumy, zdajecca, hetym nie nadta zasmučany:

«Pakłaŭšy ruku na serca, jana była napisanaja ŭ toj ža maniery, što my rabili ŭ Comedy, z hetym darosłym humaram. Heta była nie zusim dziciačaja kazka, i jana mahła syhrać u vialiki minus. Moža, ciapier joj dali b 18+. Scenaryi ŭsie ŭ mianie, i ja pacichu pierapisvaju hetuju historyju vieršami. Jość i varyjant z matam, dla darosłych».

Ci škaduje pra sychod

Viadučaja nahadała, što Pavieł Vola i Haryk Charłamaŭ zastalisia ŭ Comedy i atrymali ŭłasnyja prajekty, a Haryk Marcirasian staŭ hienpradziusaram. Ci nie škaduje Hałyhin, što admoviŭsia ad usiaho hetaha? Jon adkazvaje, što sychodziŭ nienadoŭha: jaho paprasili viarnucca, i ŭ ździełcy z prodažam aktyvu Comedy Club jon užo ŭdzielničaŭ. Sychody ž i viartańni jon ličyć zvyčajnaj spravaj.

Viarnucca na ekran, tym bolš na TNT, Hałyhin nie imkniecca i tłumačyć heta z samaironijaj:

«Ja liču, što čas prajšoŭ. TNT jak kamiercyjnaja struktura — heta moładzievy kanał. Dla starpioraŭ, jakija lubili nas (ja ŭ dobrym sensie), jość TNT4. Dla aŭdytoryi moładzievaha kanała ja realna «dziadula Vadzim». (…)

Što ź mianie ŭziać? U mianie čaćviora dziaciej i ŭnuk. Ja nie cikavy im. (…) Ja cudoŭna razumieju, što na moładzievym kanale chłopčyki pavinny hladzieć na dziaŭčynak, a dziaŭčynki — na chłopčykaŭ».

Šoumien davodzić, što nie zhodny, kali kažuć, što jon «źnik». Na jaho dumku, publika zanadta chutka chavaje tych, chto pajšoŭ z ekrana:

«Ludzi pryzvyčailisia: kali čałaviek źnik z bačnaj prastory, značyć, u jaho napeŭna niešta drennaje zdaryłasia. A moža, naadvarot, dobraje? (…) Moža, jon zrazumieŭ, što nie ŭ hetym ščaście: milhać, chadzić, udzielničać va ŭsich šou».

Ci razbahacieŭ na rekłamie?

Siońnia, pavodle Hałyhina, asnoŭny dachod jamu daje nie rekłama i nie karparatyvy, a ŭłasnaja kampanija, jakaja zdymaje ruskamoŭnyja prahramy, sieryjały i kino. 

Šoumien nahadvaje, što 18 hadoŭ byŭ tvaram sietki «Eldarada», i nie tolki jaje: u Biełarusi jon rekłamavaŭ mabilnaha apieratara life:), dzie hraŭ «mistera Padklučalnika», supierhieroja ŭ płaščy ź vialikim nulom na hrudziach. Ad novych prapanoŭ jon nie admaŭlajecca, ale ciapier, kaža, choča adpačyć.

Na pytańnie, ci šmat jon zarabiŭ na «Eldarada», Hałyhin adkazvaje: «Prystojna». Ale kali viadučaja ŭdakładniaje, ci chapiła hetaha na kvateru abo dom, raskazvaje inšaje:

«Usie hrošy tady razychodzilisia prosta na siamiejnyja patreby. Niama takoha, što ja zarabiŭ na dom. Heta byli hrošy, jakija adrazu raźlatalisia. Siamja ž u mianie — viedaješ, kolki na mnie zaviazana. Treba mamie dapamahać. U toj čas jakraz išła budoŭla ŭ vioscy, i tudy vielmi šmat sychodziła: źjavilisia hrošy — vyryli katłavan, potym jašče niešta. Heta byli nie varjackija hrošy».

Pra stendap

Da stendapu šoumien stavicca prachałodna: hety žanr jon, pavodle jaho słoŭ, nie lubić i nikoli im nie zajmaŭsia. Svaje manałohi na vystupach kamand jon nazyvaje «raskazam praŭdzivych historyj».

Mienavita taki žanr jon ličyć bolš ščyrym, čym toje, što ciapier vydajuć za stendap:

«Ja nikolki nie chaču prynizić uzrovień usiaho hetaha ruchu: źjaviłasia šmat dobrych stendapieraŭ. Vielmi doŭha heta ŭsio razhojdvałasia. Ale, na moj pohlad, hałoŭnaje ŭ stendapie — zaŭsiody kazać praŭdu praz pryzmu svajho «ja». Tolki ŭ hetym vypadku stendapier budzie papularny.

Bo kali ty budzieš prosta ŭplatać tudy žart, kali čuvak kaža: «Ja ŭčora z takoj ciołkaj paznajomiŭsia…» Što ty chłusiš — u ciabie žonka i dvoje dziaciej! Navošta ty padmanvaješ? (…) Kali b ty raskazaŭ, što ŭčora małodšy abkakaŭsia, a staršy ŭziaŭ i razmazaŭ, a my skazali: «Bolš tak nie rabi», — ja bolš pavieru».

Žanr stendapu, kaža Hałyhin, jamu nie vielmi cikavy, bo čaściej za ŭsio źviazany ź niaŭdałymi losami. Najpierš, na jaho dumku, heta tyčycca žanočaha stendapu:

«Uvieś čas jana traplała na niejkaha končanaha, i znoŭ u jaje ničoha nie atrymałasia. Mnie ŭ hety momant prosta škada dziaŭčat». U mužčyn ža, kaža jon, prablema ŭ falšy: «Niapraŭdu, jakuju vydajuć za humar, ja adrazu adčuvaju. Značyć, adčuvaje i inšy hladač. I hetaja niapraŭda stanovicca takoj vialikaj falšyvaj manietaj».

Viadučaja pacikaviłasia, ci viedaje jon biełaruskich stendap-komikaŭ, papularnych u Rasii, — Słavu Kamisaranku, Ivana Usoviča i Maksima Zajca.

«Zrazumieła, ja viedaju ich usich. Ja bačyŭ ich niedzie. Vialikija tury ŭ ich byli. Ale što ź ich tvorčaściu… Ja i apošnija Comedy nie hladžu i nie hladzieŭ. Tamu što prosta niama na heta času».

«Mnie chapiła aniekdotaŭ»

Viadučaja spytała, čamu Hałyhin sam nie zdymaje kamiedyjnyja šou.

U adkaz šoŭmien zhadaŭ, što ŭ svoj čas vypuściŭ 11 siezonaŭ «Aniekdot-šou». A voś rabić niešta novaje ŭ hetym žanry jon nie śpiašajecca.

«Ja krychu stamiŭsia ad humaru, ščyra tabie skažu. Hetaje viečnaje «buhaha». Chočacca pasprabavać niešta inšaje. (…) Leźci ŭ niejkaje pole, kankuravać z tymi, chto tam daŭno znachodzicca, — tak sabie biznes-zadača. Buduć paraŭnoŭvać. Lepš prydumać niešta trochi inšaje.

Ščyra tabie skažu, mnie chapiła voś hetaha, i aniekdotaŭ hetych chapiła. Mnie zdavałasia: oj, heta ž takaja krynica, biazdonnaja bočka. A siezonaŭ praź piać, chiba, ja zrazumieŭ, što ŭžo vielmi ciažka znachodzić aniekdoty, jakija mohuć pa-sapraŭdnamu publiku viesialić, śmiašyć, pa sutnaści. Tamu što nie tak i šmat hetaj narodnaj tvorčaści. Paśla taho jak prahučali samyja śmiešnyja, tyja, što mienš śmiešnyja, užo zdajucca niaśmiešnymi».

Kamientary

Ciapier čytajuć

Pamiatajecie biazdomnaha błohiera, jaki paśla pratestaŭ pierabraŭsia ŭ Polšču? Ciapier jon žyvie na Łazurnym bierazie20

Pamiatajecie biazdomnaha błohiera, jaki paśla pratestaŭ pierabraŭsia ŭ Polšču? Ciapier jon žyvie na Łazurnym bierazie

Usie naviny →
Usie naviny

U lesie na miažy Biełarusi z Łatvijaj źnik kienijec. Jaho šukajuć svajaki3

U Atłantyčnym akijanie imkliva razrastajecca hihancki pojas vodaraściaŭ1

Praviali losavańnie čverćfinałaŭ futbolnaj Lihi nacyj3

Tramp: Pucin skazaŭ mnie, što nie pajšoŭ by vajnoj na Ukrainu, kali b ja tady byŭ prezidentam18

Prosta źniać łaźniu ŭ ahrasiadzibie bolš nie vyjdzie. Dla ŭładalnikaŭ i haściej zapracavali novyja praviły6

Paśla vykryćcia sproby palityčnaha zabojstva Danija abmiažoŭvaje vydaču viz rasijanam i vykidaje z krainy rasijskaha ataše

«Tabie jašče pryjdziecca vybačycca». Cichanoŭski adkazaŭ Sieviaryncu125

Ministr abarony Hiermanii zaklikaŭ jeŭrapiejcaŭ jechać da Pucina ŭ Maskvu9

USU vyzvalili 14 viosak na Charkaŭščynie. Apieracyja «Miadźviedžy kapkan» prachodziła ŭ režymie poŭnaj sakretnaści7

bolš čytanych navin
bolš łajkanych navin

Pamiatajecie biazdomnaha błohiera, jaki paśla pratestaŭ pierabraŭsia ŭ Polšču? Ciapier jon žyvie na Łazurnym bierazie20

Pamiatajecie biazdomnaha błohiera, jaki paśla pratestaŭ pierabraŭsia ŭ Polšču? Ciapier jon žyvie na Łazurnym bierazie

Hałoŭnaje
Usie naviny →

Zaŭvaha:

 

 

 

 

Zakryć Paviedamić