U Mieksicy zatrymali adnaho z najbolš šukanych narkabaronaŭ — za infarmacyju pra jaho abiacali $5 młn
U rehijonie pačalisia pierastrełki i błakavańnie daroh.

U horadzie Huasavie ŭ Mieksicy 20 listapada zatrymali Faŭsta Isidra Miesu Fłoresa pa mianušcy «El Čapa Isidra». Jon kiravaŭ adnoj z frakcyj narkakartela Sinałoa, i jaho šukali i Mieksika, i ZŠA, paviedamlaje El País.
Razam z narkabaronam u domie zatrymali jaho namieśnika Sierafina i finansavaha apieratara. Jašče ŭ tuju ž noč El Čapa Isidra vyvieźli samalotam VPS u Miechika.
FBR uklučyła El Čapa Isidra ŭ śpis dziesiaci samych vyšukvalnych złačyncaŭ i abiacała $5 młn uznaharody za infarmacyju pra jaho. Jaho aporaj byli Huasavie, Łos-Močys i hornyja pasieliščy nakštałt Badyrahuata. Jon uznačalvaŭ strukturu, jakoj kaliści kiravali braty Bieltran Lejva. Apošnija dva hady frakcyi Husmanaŭ (synoŭ «El Čapa») i Sambadaŭ (synoŭ «El Maja») vajujuć pamiž saboj, i Miesa Fłores za hety čas umacavaŭsia. Jaho nazyvali hałoŭnym eksparcioram narkotykaŭ ź Sinałoa. U kancy 2024 hoda ŭ Huasavie kanfiskavali bolš za tonu fientaniłu, i heta samaja vialikaja takaja kanfiskacyja ŭ historyi krainy.
Pa centry i poŭnačy Sinałoa prakaciłasia chvala pierastrełak, padpałaŭ hruzavikoŭ i błakavańniaŭ daroh, nad haradami latali vajskovyja viertaloty. Da poŭnačy ŭłady naličyli nie mienš za 11 błakavańniaŭ u municypalitetach Achomie, Huamučyl, Huasavie i Navałata, 13 miescaŭ, dzie na darohu raskidali šypy, i 3 zachopy aŭtamabilaŭ. Ułady štata zaklikali žycharoŭ chavacca i nie karystacca trasami na poŭnač ad Kulijakana.
Kamientary