Vajna22

Ci pahražaje Krymu błakada praz paralizavany Krymski most?

Krymski most, vidać, zaznaŭ samyja surjoznyja paškodžańni ad času pačatku poŭnamaštabnaj vajny. Paśla dvuch udaraŭ adna z arak abvaliłasia, a aŭtamabilnyja znosiny z akupavanym paŭvostravam spynilisia. Čyhunačny ruch adnavili, ale pakul pa adnoj kalainie. Ci zmoža Rasija kampiensavać stratu pierapravy inšymi maršrutami i ci pahražaje Krymu transpartnaja błakada, piša na Bi-bi-si vajskovy analityk Illa Abišaŭ.

Kałaž: Bi-bi-si

Što viadoma pra paškodžańni

U noč na 17 listapada Krymski most zaznaŭ paŭtornuju ataku. Pavodle paviedamleńniaŭ manitorynhavych kanałaŭ, adna z arak abvaliłasia i ŭpała ŭ Kierčanski praliŭ. Hienštab USU zajaviŭ, što aŭtamabilnaja častka mosta całkam vyjšła sa stroju, a čyhunačnaja taksama zaznała paškodžańni.

Prezident Ukrainy Uładzimir Zialenski paviedamiŭ, što apieracyju rychtavali niekalki tydniaŭ i kaardynavali SBU i Hienštab.

Spačatku ruch pa moście całkam spynili. Paźniej čyhunačnyja znosiny adnavili pa adnoj kalainie, tady jak na druhoj praciahvajucca ramontnyja raboty. Aŭtamabilnaja častka tak i zastajecca zakrytaj. Rasijski vice-premjer Marat Chusnulin paviedamiŭ, što ŭradavaja kamisija abmierkavała alternatyŭnyja maršruty dastaŭki hruzaŭ u Krym, acenku paškodžańniaŭ i pačatak adnaŭlenčych rabot.

Pavodle paviedamleńniaŭ manitorynhavych telehram-kanałaŭ, razburana adna z arak Krymskaha mosta. Fota: Exilenova+

Ci pahražaje Krymu transpartnaja błakada?

Krymski most praz Kierčanski praliŭ pieražyŭ užo dźvie vialikija ataki, u vyniku jakich byli surjozna paškodžanyja aŭtamabilnyja praloty. Heta adbyłosia 8 kastryčnika 2022 hoda i 17 lipienia 2023-ha.

Adnak ciapierašnija razbureńni vyhladajuć bolš maštabnymi. Hetym razam havorka idzie pra paškodžańnie vialikaj arkavaj kanstrukcyi.

Paśla ataki 16 listapada ruch aŭtamabilaŭ pa moście abmiežavali. Paźniej rasijski vice-premjer Marat Chusnulin paviedamiŭ, što jaho adnavili ŭ reviersiŭnym režymie.

Paŭtornaja ataka ŭ noč na 17 listapada akazałasia jašče bolš mahutnaj. U joj vykarystali nie tolki bieśpiłotniki, ale i rakiety — u pryvatnaści FP-5 «Fłaminha». U rajonie mosta znoŭ prahučali vybuchi — pryčym u toj ža samaj jaho častcy, jakaja zaznała ŭdar napiaredadni.

Na videazapisach, što źjavilisia ŭ aŭtorak ranicaj, vidać, što adnoj z arak aŭtamabilnaj častki ŭžo niama, a ŭčastak darožnaha pałatna apynuŭsia ŭ vadzie. Paralelnaja arkavaja kanstrukcyja čyhunačnaj častki ŭstajała, adnak, mahčyma, taksama paškodžana.

Pavodle paviedamleńniaŭ zachodnich i ŭkrainskich miedyja, usia masiŭnaja aŭtamabilnaja arka daŭžynioj kala 227 mietraŭ razburyłasia i ŭpała ŭ praliŭ.

Heta, vidavočna, krytyčnaje paškodžańnie pierapravy. Arka — nie prosta dekaratyŭny elemient mosta. Jana biare ŭdzieł u raźmierkavańni nahruzki i padtrymlivaje kanstrukcyju pralota, zabiaśpiečvajučy ŭstojlivaść usioj sistemy.

Pra poŭnuju błakadu Kryma pakul što havaryć zanadta rana. Ale ryzyka surjoznaha transpartna-łahistyčnaha kryzisu prykmietna ŭzrasła.

Razbureńnie arkavaj kanstrukcyi Krymskaha mosta abmiažoŭvaje znosiny z Rasijaj — prynamsi da adnaŭleńnia pierapravy. U toj ža čas Krym nie zastajecca całkam adrezanym ad śvietu.

Pa-pieršaje, zastajecca suchaputny kalidor praz akupavanyja rajony Zaparožskaj i Chiersonskaj abłaściej. Adnak Ukraina sistematyčna nanosić udary pa transpartnych maršrutach na poŭnačy Kryma, mastach i inšych pierapravach u rajonie Čanhara. Heta ŭžo stvaryła prablemy z dastaŭkaj paliva i inšych hruzaŭ, u pryvatnaści vajskovych.

Pa-druhoje, jość paromnaja pieraprava praz Kierčanski praliŭ. Jana moža častkova kampiensavać stratu mosta, ale jaje mahčymaści vielmi abmiežavanyja. Da taho ž sama pieraprava taksama ŭraźlivaja dla ŭkrainskich udaraŭ.

Pa-treciaje, Rasija moža pastaŭlać hruzy ŭ akupavany Krym moram. Ale i hety šlach źviazany z ryzykami, pakolki ŭ akvatoryi dziejničaje šmat ukrainskich marskich i pavietranych bieśpiłotnikaŭ. Akramia taho, abłomki Krymskaha mosta, asabliva jaho vielizarnaja arka, mahli pierakryć sudnachodny kanał. Heta ŭskładniaje prachod vialikich sudnaŭ i stvaraje dadatkovyja prablemy dla partoŭ Azoŭskaha mora, jakija zaraz akupavanyja rasijanami — Maryupala i Biardzianska.

Krymski most — zakonnaja vajskovaja cel

Kijeŭ nieadnarazova zajaŭlaŭ, što ličyć Krymski most zakonnaj vajskovaj cellu, pakolki Rasija vykarystoŭvaje jaho dla zabieśpiačeńnia svaich vojskaŭ. U svaim paviedamleńni pra apieracyju Uładzimir Zialenski taksama padkreśliŭ, što ŭdar pa moście staŭ adkazam na rasijskija ataki na ŭkrainskuju cyvilnuju infrastrukturu.

«Rasija štodnia nanosić udary pa našaj infrastruktury, u pryvatnaści pa mastach u Zaparožžy, Dniapry, Kijevie, na Adeščynie. My adnaŭlajem našu infrastrukturu. Ale i nahadvajem Rasii, što vajna zaŭsiody budzie viartacca tudy, adkul jana pačałasia», — zajaviŭ prezident Ukrainy.

Heta treciaja vialikaja ataka na Krymski most ad pačatku poŭnamaštabnaha ŭvarvańnia Rasii va Ukrainu. U kastryčniku 2022 hoda na moście padarvali hruzavik z vybuchoŭkaj, u vyniku čaho było razburana niekalki pralotaŭ.

Uletku 2023 hoda most atakavali marskija bieśpiłotniki — tady razburyli adzin z aŭtamabilnych pralotaŭ.

Uletku 2025 hoda USU praviali jašče adnu apieracyju, zakłaŭšy vybuchoŭku pad aporami mosta. Tady, adnak, rasijskija ŭłady śćviardžali, što kanstrukcyja nie zaznała paškodžańniaŭ.

Kamientary2

  • 1
    17.11.2026
    Vatnych Durniaú jašče z 2023 ( a to i raniej) papiaredžvali kab vyjazdžali z Kryma na rośsiju
  • )))))
    17.11.2026
    Voobŝie nie choču ujezžať iz Kryma, zdieś taaaak kłassno, po domašniemu...

Ciapier čytajuć

Ci pahražaje Krymu błakada praz paralizavany Krymski most?2

Ci pahražaje Krymu błakada praz paralizavany Krymski most?

Usie naviny →
Usie naviny

Niamieckija futbolnyja kłuby pačali abmiažoŭvać smartfony na stadyjonach

Rasija atakavała balistyčnymi rakietami Paŭnočny i Paŭdniovy masty Kijeva2

U Rasii zajavili, što ŭdzieł Jeŭropy ŭ pieramovach pa Ukrainie ź imi nie ŭzhadniaŭsia. Choć Uitkaf i Kušnier śćviardžali advarotnaje2

Byłaja žonka bujnoha biełaruskaha biznesmiena pryśviaciła razvodu mastackuju vystavu: z vykarystanymi preziervatyvami12

Pa Mazyry panieślisia čutki pra mańjaka i sieryjnyja zabojstvy. A što napraŭdu?

18‑hadovy arhiencinski futbalist pamior paśla prylotu miača ŭ hałavu1

Ursuła fon der Lajen pryviała Biełaruś jak prykład, da čaho pryvodzić admova ad jeŭraintehracyi21

Biejonse stała pieršaj artystkaj, jakuju naminavali na «Hremi» 100 razoŭ1

Rasijski chakieist, jaki amal usiu karjeru hulaŭ u Biełarusi, pajšoŭ zavajoŭvać Ukrainu i zahinuŭ1

bolš čytanych navin
bolš łajkanych navin

Ci pahražaje Krymu błakada praz paralizavany Krymski most?2

Ci pahražaje Krymu błakada praz paralizavany Krymski most?

Hałoŭnaje
Usie naviny →

Zaŭvaha:

 

 

 

 

Zakryć Paviedamić