U Vilni pakažuć rastruščany siłavikami biust Ivana Łuckieviča. Da 120‑hodździa «NN» Biełaruski muziej adkryvaje vystavu z unikalnymi ekspanatami
Muziej sabraŭ artefakty «NN» jak pačatku XX, tak i 1990‑ch dy XXI stahodździa — i śmiešnyja, i strašnyja.

23 listapada ŭ Vilenskim biełaruskim muziei imia Ivana Łuckieviča adbudziecca adkryćcio vystavy «Hołas stahodździa. 120 hadoŭ «Našaj Nivie».
Adnym z centralnych ekspanataŭ budzie restaŭravany biust zasnavalnika vydańnia, Ivana Łuckieviča, jaki stajaŭ u Redakcyi ŭ Minsku. 8 lipienia 2021 hoda, u dzień aryštu redaktaraŭ vydańnia, pry kancy pieratrusu adzin z HUBAZiKaŭ lasnuŭ jaho ab padłohu. A na redakcyjnaj došcy napisaŭ: «Naša Niva RIP». Jany mierkavali, što zabili vydańnie, što jany nie adrodzicca.
Upieršyniu budzie vystaŭleny i partret Antona Łuckieviča pracy Piotry Sierhijeviča ź siamiejnaj kalekcyi.
Datu adkryćcia vybrali nievypadkova. Mienavita 23 listapada 1906 hoda (pavodle novaha stylu) vyjšaŭ pieršy numar «Našaj Nivy». «Pieršaja biełaruskaja hazieta z rysunkami» stała — i zastajecca — najvažniejšaj placoŭkaj dla raźvićcia biełaruskaj movy.
Pačałosia ŭsio z papiarovaj haziety nakładam niekalki tysiač asobnikaŭ. Ciapier vydańnie, nasupierak represijam, vyrasła ŭ najbolšaje biełaruskaje miedyja, jakoje pracuje na internet-sajcie, u TH, Jutubie, Tyktoku, Instahramie, Fejsbuku i Tredsach adnačasova.
«Naša Niva» adyhrała vyklučnuju rolu ŭ farmavańni biełaruskaj nacyjanalnaj śviadomaści, kultury — «u pošukach biełaruskaha «my», jak sfarmulavałasia arhanizatary vystavy.
Dla anhłamoŭnych i litoŭskamoŭnych naviedvalnikaŭ padrychtavanyja asobnyja infarmacyjnyja materyjały.⠀
Adkryćcio vystavy: 23 listapada (paniadziełak), 18:30.
Miesca: Vilenski biełaruski muziej imia Ivana Łuckieviča, vuł. Vilenskaja (Vilniaus g. 20, Vilnia).
Novy vobraz Michałka. Jak prajšoŭ kancert «Lapisa Trubiackoha» ŭ Bierlinie
«A jak ty vykupiŭ adrazu akcent?» Repier Basta pa hołasie paznaŭ muzykanta z Čavusaŭ i raskazaŭ pra svajo dziacinstva ŭ zakrytym haradku pad Dziatłavam
U Małdovie admianili kancert biełaruskaha muzyki DziDziuLi paśla zvarotaŭ ukrainskich dypłamataŭ
Kamientary