Łukašenka padpisaŭ Biełaruś u čarhovy sajuz

U dekłaracyi baki zajavili ab pierachodzie da nastupnaha etapu intehracyjnaha budaŭnictva — Adzinaj ekanamičnaj prastory. U dakumiencie padkreślena, što dalejšaje raźvićcio intehracyi troch krain adkazvaje ich nacyjanalnym intaresam, spryjaje rašeńniu jakija stajać pierad imi ahulnych zadač pa pavyšeńniu dabrabytu i jakaści žyćcia hramadzian, ŭstojlivamu sacyjalna-ekanamičnamu raźvićciu, usiebakovaj madernizacyi i ŭzmacnieńniu nacyjanalnaj kankurentazdolnaści ŭ ramkach hłabalnaj ekanomiki.

U dekłaracyi taksama zajaŭlena ab imknieńni bakoŭ zaviaršyć da 1 studzienia 2015 h. kadyfikacyju mižnarodnych dahavoraŭ, jakija składajuć narmatyŭna-pravavuju bazu Mytnaha sajuza i AEP, i stvaryć na hetaj asnovie Jeŭrazijski ekanamičny sajuz, jaki budzie adkryty dla dałučeńnia inšych dziaržaŭ, jakija padzialajuć mety i pryncypy sajuza i hatovych da ich realizacyi.

* * *

«Da padpisańnia ŭ chodzie sustrečy rychtujecca dekłaracyja ab Jeŭrazijskaj ekanamičnaj intehracyi. U hetym dakumiencie zajaŭlajecca ab pierachodzie da nastupnaha etapu intehracyjnaha budaŭnictva — adzinaj ekanamičnaj prastory… U jakaści kančatkovaj mety ŭ dekłaracyi abviaščajecca stvareńnie Jeŭrazijskaha ekanamičnaha sajuza», — cytuje «Interfaks» krynicu ŭ Kramli.

Dźmitryj Miadźviedzieŭ 17 listapada ŭ Maskvie na sustrečy ź piensijanierami i vieteranami zajaviŭ: «Zaŭtra, spadziajusia, padpišam pahadnieńnie, jakoje datyčycca dalejšaj ekanamičnaj intehracyi, stvareńnia sumiesnaj struktury, jakaja budzie hetym zajmacca», — cytuje Miadźviedzieva RIA «Naviny».

Miadźviedzieŭ padkreśliŭ: kožnaja kraina, jakaja zachoča dałučycca da Mytnaha sajuza, adzinaha ekanamičnaj prastory i JeŭrAzES, pavinna zrabić heta śviadoma. «Kab nie kazali, što jaje tudy zahnali pad upłyvam niejkich ekanamičnych arhumientaŭ», — dadaŭ Miadźviedzieŭ.

Pa jaho mierkavańni, u sajuza troch dziaržaŭ vialikaja budučynia. «My i tak blizkija, ale staniem zusim blizkija», — prahnazuje rasijski lidar.

Na sustrečy miarkujecca taksama abmierkavać pytańni ŭdaskanaleńnia nadnacyjanalnych orhanaŭ kiravańnia intehracyjnymi pracesami ŭ časie stvareńnia Jeŭrazijskaha ekanamičnaha sajuza.

Pavodle źviestak pres-słužby kiraŭnika Biełarusi, Alaksandr Łukašenka vypraviŭsia ŭ Maskvu 17 listapada.

U pačatku kastryčnika stvaryć Jeŭrazijski sajuz prapanavaŭ premjer i — nichto nie sumniajecca — budučy prezident Rasii Uładzimir Pucin. U svaim artykule Pucin razvažaŭ pra toje, što Rasieja, Biełaruś i Kazachstan pavinny stvaryć sajuz. Paźniej u «Iźviestijach» vyjšaŭ taksama kamplimientarny artykuł Alaksandra Łukašenki. Kiraŭnik Biełarusi, choć i adznačyŭ tam nieparušnaść suvierenitetu Biełarusi, prysiahaŭ u viernaści Maskvie.

U Rasii budučy sajuz bačać jak formu pašyreńnia Rasii.

17 listapada, napiaredadni vizitu Łukašenki, pierśpiektyvy stvareńnia Jeŭrazijskaha sajuza abmiarkoŭvali na kanfierencyi «Adzinaj Rasiei» u Dziarždumie.

Havoračy ab pierśpiektyvach Jeŭrazijskaha sajuza, deputaty Dziarždumy Uładzimir Miadzinski i Robiert Šlehiel vykarystoŭvali termin «vialikaja kraina».

Inšyja ŭdzielniki sustrečy nastojvali, što pakul havorka pavinna iści pieravažna ab ekanamičnym sajuzie, i raili ŭstrymlivacca ad termina «vialikaja kraina».

Jakija b pierśpiektyvy ni čakali palityčnuju intehracyju, ekanamičnyja pahadnieńni, padpisanyja Alaksandram Łukašenkam u 2010 hodzie, nadziejna prymuravali Biełaruś da Rasii.

Z uvachodžańniem u Adzinuju ekanamičnuju prastoru Biełaruś stracić stymuły dla dyviersifikacyi krynic enerhanośbitaŭ i madernizacyi enerhasistemy. Za takuju pryviazku Biełarusi da Rasii Kreml ščodra płacić Łukašenku palityčnaj padtrymkaj i naftahazavymi źnižkami.

* * *

Čarnavy prajekt dekłaracyi ab stvareńni Jeŭrazijskaha sajuza raźmieščany na aficyjnym sajcie Mytnaha sajuza.

U asnoŭnym tekście dakumienta havorycca pra namier dziaržavaŭ imknucca da praviadzieńnia ŭzhodnienaj palityki ŭ samych roznych śfierach: ad zabieśpiačeńnia «efiektyŭna funkcyjanavańnia supolnaha rynku tavaraŭ, pasłuh, kapitału i pracoŭnych resursaŭ» da «farmavańnia adzinaj pramysłovaj, transpartnaj i enierhietyčnaj palityki, pahłybleńnie vytvorčaj kaapieracyi».

«JEES budzie hruntavacca na pryncypach zachavańnia ahulnapryznanych normaŭ mižnarodnaha prava, uklučajučy pavahu suvierenitetu i roŭnaści dziaržaŭ, zaćviardžeńnia Asnovatvornych pravoŭ i svabod čałavieka, pravavoj dziaržavy i rynkavaj ekanomiki», — abiacajecca ŭ prajekcie. U dakumiencie adznačajecca, što «ŭ svaim praktyčnym supracoŭnictvie» baki «buduć kiravacca normami i praviłami Suśvietnaj handlovaj arhanizacyi», a ŭsie krainy — udzielnicy sajuza buduć imknucca stać siabrami SHA.

Krainy buduć imknucca da ažyćciaŭleńnia ŭzhodnienaj ekanamičnaj palityki i pahłybleńnia supracoŭnictva ŭ valutnaj śfiery, taksama vynikaje z prajekta. Paznačany i kurs na «pahłybleńnie raboty pa pašpartna-vizavych pytańniach» i «harmanizacyi imihracyjnaha zakanadaŭstva ŭ halinie pieramiaščeńnia pracoŭnych resursaŭ».

Dakumient užo abmiarkoŭvaŭsia kamisijaj Mytnaha sajuza 23 vieraśnia. Tady kamisija pryniała rašeńnie, što prajekt treba dapracavać i «ŭnieści jaho dla razhladu na čarhovaje pasiadžeńnie miždziaržaŭnaj rady Jeŭrazijskaj ekanamičnaj supolnaści (vyšejšaha orhana Mytnaha sajuza) na ŭzroŭni kiraŭnikoŭ uradaŭ». Hetaje Pasiadžeńnie adbyłosia ŭ Sankt-Pieciarburhu 16 kastryčnika. Dekłaracyja ab farmiravańni sajuza była ŭ liku padpisanych premjerami dakumientaŭ.

Na dapracoŭku dakumient byŭ adpraŭleny z-za zaŭvah, pradjaŭlenych Kazachstanam. Sutnaść ŭsich pravak prajekta zvodzicca da adnaho: Kazachstan nie zhodny z prapanavanaj Rasiejaj i Biełaruś nazvaj «Jeŭrazijski sajuz». Abrevijatura JEES pa ŭsim tekście prajekta vypraŭlenna kazachami na AEP (adzinuju ekanamičnuju prastoru).

• 0
• 0
• 0
• 0
• 0
• 0
• 0
• 0