Ekanamičnaja chronika

Ekanamičnaja chronika

Pryzavy — kožny treci

“Biełaruskija latarei” vypuściać novuju seryju kvitkoŭ “Imhnieńnie ŭdačy” koštam 1000 rubloŭ. Ich planujuć pradać 120 tys. Pryzavym budzie amal kožny treci kvitok. Ciapier u Biełarusi dziejničaje dziasiatak latarejaŭ, niedzie kožny šosty kvitok — pryzavy. Sioleta pradali kvitkoŭ na miljard 480 młn. rubloŭ. Ź ich u biudžet trapiła 131 młn. 915 tys. rubloŭ, 700 młn. pajšło na pryzavyja fondy.

Ilhoty nie dla ŭsich

Sacyjalnyja strachoŭki admieniać dla pradprymalnikaŭ-pensijaneraŭ, invalidaŭ i studentaŭ. U Ministerstvie pracy kažuć, što lhotaŭ inšym pradprymalnikam pakul nie daduć. Siońnia zapazyčanaść pradpryjemstvaŭ i kałhasaŭ pensijnamu fondu składaje 75% ad patreby na vypłaty pensijaneram za miesiac.

Viedy za hrošy

Urad zaćvierdziŭ śpis płatnych pasłuhaŭ u sfery adukacyi. Tak, škołam dazvolili ładzić dadatkovyja zaniatki z vučniami za hrošy. U najbližejšy miesiac buduć raspracavanyja taryfy na płatnyja pasłuhi.

Sto hadoŭ harantyi

Manalitnyja masty pačali vyrablać na “Mienskabłdarbudzie”. Kaštujuć jany na 30% tańniej, bo ich nia treba źbirać z asobnych žalezabetonnych častak. Pradpryjemstva daje manalitnamu mostu harantyju da 100 hadoŭ.

Staŭki na dziaržzamovu

Minimalnyja hanarary mastakam i skulptaram vyznačyła Ministerstva kultury. Ciapier tvorcy, što vykonvajuć dziaržzamovu, buduć atrymlivać ad troch bazavych vieličyniaŭ (33300 rub.) za zamaloŭki i eskizy da 400 BV (4.440.000 rub.) za manument.

Zakon pra cukar

Dyrekcyja Skidalskaha cukrovaha kambinatu źviarnułasia da ŭładaŭ Haradzienščyny z prapanovaj inicyjavać zakon, jaki b rehulavaŭ adnosiny pamiž pierapracoŭščykami, pastaŭnikami syraviny j realizatarami. Cana na cukar pavinna farmavacca na pradpryjemstvie z ulikam sabiekoštu pradukcyi, ličać skidalcy. Siońnia jana ŭstaloŭvajecca kiraŭnictvam krainy, pry hetym intaresy pastaŭnikoŭ syraviny i pierapracoŭščykaŭ amal nia ŭličvajucca.

Na “Škło-Hłušy” hłucha

Dramaj dla žycharoŭ pasiołku Hłuša (Babrujščyna) stałasia zakryćcio miascovaha zavodu, na jakim pracavała tracina dvuchtysiačnaha nasielnictva. Popyt na vyraby AAT “Škło-Hłuša” — kańjačnyja j harełačnyja butelki, plaški dla kietčupaŭ i pepsi-koły — rezka pamienšaŭ, pradpryjemstva vinavataje vializnyja sumy pa bankaŭskich rachunkach, kredytach i za enerharesursy. Adzin z kredytoraŭ źviarnuŭsia ŭ haspadarčy sud, i toj abviaściŭ AAT bankrutam. Inšaj pracy ŭ pasiołku niama, i navat nieabchodnyja 2/3 siaredniaha zarobku kredytory admaŭlajucca vypłačvać. Tolki ŭ žniŭni vydatkavana 25 młn. rubloŭ, jakija raźmierkavali najpierš pamiž siemjami, čyje dzieci pavinny byli pajści ŭ škołu.

Na 22 kastryčnika pryznačanyja tarhi pa prodažy majomaści pradpryjemstva.

Novaja pradstaŭnica MVF

1 listapada raspačnie pracu novy pradstaŭnik MVF u Biełarusi j Litvie Ziuzana Bryksijova. Žyć Z.Bryksijova budzie ŭ Vilni. Naradziłasia jana ŭ Čechasłavakii, zajmałasia prablemami ekanomiki Blizkaha Ŭschodu. Na staŭleńni MVF da krainy hetaje pryznačeńnie nie adabjecca.

“Santa” sertyfikavanaja

Pieršy ŭ Biełarusi sertyfikat adpaviednaści mižnarodnaj systemie HACCP (Hazard Analysis and Critical Control Point) atrymała pradpryjemstva “Santa-Bremar”, što pracuje ŭ volnaj ekanamičnaj zonie “Bieraście” i vyrablaje pradukty charčavańnia. NASSR harantuje jakaść praduktaŭ i z 2004 h. zrobicca abaviazkovaj u Eŭropie.

“Homsielmaš” — bankrut?

Abviaścić “Homsielmaš” bankrutam choča sankt-pieciarburskaje TAA “Pietrakamplekt”, jakomu homielcy nibyta vinnyja 2 młn. rasiejskich rubloŭ za metałaprakat. Miž tym, zapazyčanaść kałhasaŭ i saŭhasaŭ samomu “Homsielmašu” składaje 40 młn. rubloŭ. Zarobkaŭ tam nie atrymlivali sa žniŭnia. Sudździa Siarhiej Kałodka viarnuŭ pazoŭ rasiejcaŭ na dapracoŭku: nie byli ŭličanyja ŭmovy biełaruskaha Zakonu ab bankructvie.

A.K., S.I.