У Індыі выпаў з акна гатэля расійскі дэпутат-«адзінарос» са спіса Forbes
У горадзе Раягада на ўсходзе Індыі ля Бенгальскага заліва разбіўся насмерць дэпутат ад «Адзінай Расіі» з Уладзімірскай вобласці Павел Антаў. Паведамляецца, што ён выпаў з акна гатэля. Раней Антаў уваходзіў у рэйтынг Forbes найбагацейшых расійскіх дзяржслужачых і дэпутатаў.
65-гадовы Антаў 25 снежня ўпаў з трэцяга паверха гатэля Sai International. Усяго ў гатэлі тры паверхі, на фасадзе ў некалькіх нумарах ёсць балконы.
За некалькі дзён да таго, 22 снежня, сябру Антава, 61-гадоваму прадпрымальніку Уладзіміру Быданаву, стала дрэнна ў нумары «ад празмернай колькасці алкаголю», і ён памёр у шпіталі.
У паліцыі смерць Антава назвалі суіцыдам, а генеральны консул Расіі ў Калькуце Аляксей Ідамкін сказаў, што паліцыя «пакуль не бачыць крымінальнага складніка» ў абедзвюх смерцях.
Некралог па Антаве з'явіўся на сайце уладзімірскага Заканадаўчага сходу, прычыны смерці там не называюцца.
Паводле інфармацыі расійскай «Медыязоны», у 2000-х Павел Антаў заснаваў мясаперапрацоўчы камбінат «Уладзімірскі стандарт». У 2018 годзе, калі ён стаў дэпутатам ад «Адзінай Расіі», задэклараваў даход у 9,97 млрд рублёў і ўзначаліў рэйтынг Forbes па даходах дзяржслужачых і дэпутатаў. У наступным годзе ён заняў 26-е месца, а ў 2021-м у спіс ужо не трапіў.
У чэрвені ў запісе Антава ў Whatsapp з'явілася сторыс пра абстрэл расійскімі вайскоўцамі жылога дома ў Кіеве. Ад трапляння ракеты ў шматпавярхоўку пацярпелі шэсць чалавек, у тым ліку расійская грамадзянка і яе дачка; муж жанчыны загінуў. У сторыс Антава былі словы: «Па праўдзе кажучы, інакш, чым тэрор, гэта ўсё назваць вельмі складана».
Неўзабаве сторыс выдалілі, а Антаў назваў яе «вынікам тэхнічнай памылкі». «Падкрэслю яшчэ раз, што я з'яўляюся прыхільнікам прэзідэнта і патрыётам сваёй краіны, шчыра падзяляю мэты «СВА», — дадаў тады «адзінарос».
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку7
Каментары