Драконаўскія папраўкі скіраваны супраць апазыцыі
21 чэрвеня палата прадстаўнікоў прыняла папраўкі ў Кодэкс аб адміністрацыйных парушэньнях. У дакумэнце працягнутыя да трох гадоў тэрміны накладаньня спагнаньня за эканамічныя правапарушэнні.
У кодэкс дададзена палажэньне аб адміністрацыйнай адказнасьці за парушэньне СМІ заканадаўства ад друку пасьля паўторнага на працягу году вынясеньня яму пісьмовага папярэджаньня. У такім выпадку на індывідуальнага прадпрымальніка будзе накладацца штраф у памеры ад 20 да 100 базавых велічыняў, на юрыдычную асобу — ад 100 да 500.
Узмацняецца таксама адказнасьць за нямэтавае выкарыстаньне замежнай бязвыплатнай дапамогі.
Партызанка — задача абароны
Тэрытарыяльная абарона Беларусі заснавана на прынцыпах партызанскага руху, заявіў журналістам намесьнік начальніка Ўзброеных сіл па навуковай працы генэрал-маёр Юры Партноў. Войскі тэрытарыяльнай абароны Беларусі прызначаныя для дзеяньняў на часова захопленай ці пакінутай тэрыторыі, «каб ствараць актыўны фронт супраціву».
Мэтро — на летні графік
З 4 ліпеня па 31 жніўня менскае мэтро будзе хадзіць па летняму графіку, цягнікоў паменее. У будныя дні інтэрвалы між цягнікамі павялічацца да трох хвілінаў, у выхадныя — да чатырох хвілінаў. Увечары інтэрвалы ня зьменяцца.
Арыштаваны скурнік-вэнэроляг
Пракуратура распачала крымінальную справу (хабар) у дачыненьні да намесьніка галоўнага лекара Менскага скурна-вэнэралягічнага дыспансэру Эдуарда Ткачова. Яго затрымалі ў службовым кабінэце апэратыўнікі сьледчага аддзелу УУС Маскоўскага раёну. Паводле сьледчых, Ткачоў, які адказваў за гаспадарчую дзейнасьць, атрымаў хабар $800. Супрацоўнікі заяўляюць, што арышт кіраўніка выклікаў у іх шок, яны ня могуць паверыць у хабар.
Кожны трэці з сотавым
Колькасьць абанэнтаў сотавай сувязі ў Беларусі перавысіла 3 мільёны чалавек. Абанэнтамі МТС зьяўляюцца 1,559 млн чалавек, «Velcom» — 1,39 млн, у кампаніі «Белсэл» — 93 тыс. абанэнтаў.
АГ, АШ; svaboda.org, interfax.by
Цяпер чытаюць
35 маладых беларусаў і беларусак, за якімі варта сачыць: апублікаваны першы спіс Next 3522
Каментары