Прэйгерман: «Улады не столькі хочуць спрасціць візавы рэжым, колькі стварыць нейкі парадак дня ў адносінах Беларусі і ЕС»
Дырэктар па даследаваннях «Ліберальнага клуба» Яўген Прэйгерман пракаментаваў заяву Уладзіміра Макея:
«Заява міністра звязана не столькі з тым, што беларускія ўлады сапраўды лічаць, што настаў час спрасціць візавы рэжым з ЕС, колькі з жаданнем стварыць нейкі парадак дня ў адносінах Беларусі і ЕС.
Сёння такі парадак дня фактычна адсутнічае. Нават калі будзе вырашана пытанне палітвязняў, без чаго ЕС не гатовы актывізаваць адносіны з Мінскам, не зусім зразумела, пра што менавіта будзе дыялог і што дасць магчымасць вывесці яго на змястоўны ўзровень.
У гэтых адносінах крок Макея можна ацаніць як рацыянальны і разумны. Пасля віленскага саміту «Усходняе партнёрства» уступае ў перыяд стратэгічнай нявызначанасці.
Пасля правалу падпісання Пагаднення аб асацыяцыі з Украінай еўрапейскім палітыкам і чыноўнікам трэба як мага больш нейкіх бачных вынікаў гэтай ініцыятывы. Візавая тэма як раз адказвае крытэру важнасці для інстытутаў ЕС і беларускага трэцяга сектара, а таксама з'яўляецца прымальнай дыскусійнай тэмай для беларускіх уладаў.
У той жа час наўрад ці можна чакаць хуткага вырашэння гэтага пытання нават пры «канструктыўным настроі» з боку Еўрапейскага саюза. Акрамя традыцыйнай палітычнай боязі, візавае пытанне сёння мае і эканамічнае вымярэнне для Беларусі:
праблема актыўнага шопінг-турызму беларускіх грамадзян у Польшчы і Літве, а таксама адток працоўнай сілы з Беларусі. Спрашчэнне візавага рэжыму з ЕС здольна яшчэ больш абвастрыць гэтыя праблемы.
Таму, па ўсёй бачнасці, візавай тэме быць доўгаіграючай на парадку дня Беларусі і ЕС».
Шпакоўскі пра саўладальніка «Варгеймінга» Кацалапава: Прафінансаваў пратэсты на 296 тысяч даляраў2
Каментары