Мітрапаліт Павел у першым інтэрв'ю: Нашто вы навязваеце дэмакратыю?
Ён засцярог беларусаў ад змены кірунку, у якім ідзе краіна.
Мітрапаліт Павел, якога Святы Сінод Рускай Праваслаўнай Царквы прызначыў мітрапалітам Мінскім, даў сваё першае інтэрв'ю — урадаваму тэлеканалу СТВ. «Мяне радуе, што Аляксандр Рыгоравіч выдатна ведае сітуацыю ў краіне, ведае значэнне царквы і веры для людзей, — сказаў мітрапаліт.
— Пры такім добрым стаўленні, вядома, думаю, будзем займацца суработніцтвом [праваслаўны выраз, які азначае супрацоўніцтва, сінергію — НН]: кожны будзе выконваць сваю справу, несці сваю місію. Я бачыў велізарную розніцу, што ёсць у Беларусі і тут у нас [у Расіі — НН]», — заявіў мітрапаліт Павел.
«У Мінску можна ў любы час, і днём, і ноччу, выйсці, вы можаце хадзіць без аховы, на вас ніхто не нападзе, не абрабуе. Людзі ўжо ўбачылі перамены да лепшага, і я думаю, што людзі зразумеюць, хто іх кіраўнік.
Ні ў кога, можа быць, нават не ўзнікне думкі змяніць кірунак, па якім сёння ідзе беларускі народ і Беларусь у цэлым.
Я буду рабіць усё магчымае, каб мір і блаславенне перабывалі на блаславёнай беларускай зямлі», — заявіў мітрапаліт Павел.
Адказваючы на пытанне пра сваё стаўленне да заходніх каштоўнасцяў, ён сказаў: «Калі гэта дэмакратыя — заходняе дабро, нашто вы так навязваеце яго рознымі шляхамі і падкупляеце? І Балотная. А цяпер на Хрышчаціку што дзеецца…
Калі заходнія каштоўнасці настолькі добрыя для людзей, навошта вы іх навязваеце? Прапануйце, і людзі самі да вас пойдуць. А паглядзіце на Югаславію, на Лівію, Егіпет… Калі гэта дабро, паглядзіце, як гэтае добра хутка заканчваецца».
«Так што я не супраць заходніх каштоўнасцяў маральных ці духоўных, але не трэба нас заганяць, — падсумаваў ён. — Пакуль жа рух на Захад для мітрапаліта Мінскага і Слуцкага Паўла абмяжуецца межамі Беларускага экзархата Рускай праваслаўнай царквы», — пажартаваў ён.
Ён таксама заявіў, што чытаў адзін артыкул у беларускіх СМІ з рэакцыяй на сваё прызначэнне. «Мне паказалі артыкул, там сказана, што да нас едзе кансерватар, які ненавідзіць атэістаў, камуністаў, геяў і Захад. Вы ведаеце, гэта няправільна сказана. Я не магу ненавідзець або пагарджаць людзьмі, я павінен усіх любіць. Але як праваслаўны святар я павінен сказаць: сябры мае, я вас не асуджаю, але шкадую, спачуваю, што вы стаіце на шляху згубным», — адзначыў мітрапаліт.
Як вядома, у расійскай і беларускай афіцыйнай прапагандзе ўзяты курс на атаесамленне Захаду з гей-свабодамі, і мітрапаліт тут ідзе ў тым самым рэчышчы.
Мітр. Павел мае рэпутацыю кансерватара і рускага нацыяналіста. Сярд іншага, ён заяўляў, што Расія можа «адкрыць чарнобыльскі кранік», ужыць ядзерную і бактэрыялагічную зброю ў выпадку пагрозаў сабе.
Прызначэнне мітрапалітам Мінска ўладыкі, які не беларус і ніколі не працаваў у Беларусі, выклікала неўразуменне і горыч ў беларускім праваслаўі. Тут спадзяваліся, што новы ўладыка будзе чалавекам з Беларусі. Аднак пры мітрапаліту Філарэту на пачатку 90-х БПЦ, у адрозненне ад Украінскай праваслаўнай царквы Маскоўскага патрыярхата, не дабівалася права самой выбіраць свайго прадстаяцеля.
Зрэшты, УПЦ тое права здабыла таму, што з'явілася Украінская праваслаўная царквы на чале з патрыярхам Кіеўскім, і Масква мусіла прадэманстраваць, што яна не абмяжоўвае правоў украінскага праваслаўя. Варта адзначыць, што і патрыярх Кіеўскі Філарэт, і мітрапаліт Кіеўскі і ўсяе Украіны Уладзімір, ачольнік УПЦ Маскоўскага патрыярхата — украінцы, а мітр. Мінскі Філарэт, як і мітр. Павел — нарадзіліся ў Расіі.
Цяпер чытаюць
Адцісканні з татам, урокі з мамай. Як жыве і вучыцца сям’я Севярынцаў у Вільні4
Каментары